Путин Мирзиёевга босимларга қарамай Москвага келгани учун раҳмат айтди

Бугун, 9 май куни Россия Президенти Владимир Путин Кремлда Ўзбекистон етакчиси Шавкат Мирзиёев билан учрашув ўтказди. Бу ҳақда Кремль матбуот хизмати хабар берди.

Ўзбекистон Президенти Россияга Иккинчи жаҳон урушидаги Ғалабанинг 81 йиллиги муносабати билан ўтказилаётган тантанали тадбирларда иштирок этиш учун борган эди.

Путин Мирзиёевни ғалабани нишонлаш арафасида кўриб турганидан мамнунлигини билдириб, бу ғалаба умумий – совет халқининг “Улуғ Ватан уруши”даги ғалабаси эканини таъкидлаган.

Россия Президентининг айтишича, сўнгги йилларда икки давлат ўртасидаги муносабатлар, жумладан Мирзиёевнинг шахсий саъй-ҳаракатлари туфайли, жуда яхши ривожланмоқда. У савдо ҳажми ортиб бораётгани, йирик иқтисодий лойиҳалар амалга оширилаётгани ва Россия Ўзбекистон иқтисодиётидаги асосий инвесторлардан бири бўлиб қолаётганини қайд этган.

Путин, шунингдек, Ўзбекистон Мирзиёев раҳбарлигида юқори суръатларда ривожланаётганини айтиб, уни бу билан табриклаган.

Россия раҳбари ҳозирги шароитда бундай учрашувлар, ҳатто байрам муносабати билан бўлса ҳам, икки давлат ўртасидаги алоҳида муносабатларнинг белгиси эканини билдирган. У бу муносабатларни “оддий дўстлик эмас, балки биродарлик ҳамкорлиги” деб атаган.

Путин Мирзиёевнинг ташқи босим ва таҳдидларга қарамасдан Москвага келгани ҳамда Қизил майдондаги ҳарбий парадда иштирок этишини “алоҳида белги” деб баҳолаб, бу учун миннатдорлик билдирган.

Мирзиёев эса ўз навбатида Путинни ва Россиянинг кўп миллатли халқини Ғалабанинг 81 йиллиги билан табриклаган.

Ўзбекистон Президентининг таъкидлашича, бу ғалаба умумий тарих ва умумий ғалаба бўлиб, уни ҳеч қачон унутмаслик керак. У ёш авлод тарбиясида ғалабанинг аҳамияти катта эканини айтди.

Мирзиёев Ўзбекистонда ҳам бу санага бағишланган тадбирлар кенг нишонланаётгани, у госпиталларга бориб, ветеранлар билан суҳбатлашганини айтган. Уларнинг кўпчилиги Путинга салом йўллашни сўраганини ҳам қўшимча қилган.

Шунингдек, Мирзиёев икки давлат ўртасидаги муносабатлар жадал ривожланаётганини таъкидлаб, яқинда ўтган Иннопром саноат кўргазмаси юқори даражада ташкил этилганини эслаган. Унинг сўзларига кўра, Россиядан биринчи вице-премьер Денис Мантуров, олти нафар губернатор ва 500 га яқин компания вакиллари Ўзбекистонга ташриф буюрган.

Мирзиёевнинг айтишича, 2026 йилнинг биринчи чорагида икки мамлакат ўртасидаги товар айирбошлаш ҳажми ўтган йилга нисбатан 33 фоизга ошган.

Ўзбекистон раҳбари Москвага келишидан мақсад набиралари, фарзандлари ва ёш авлодга уларнинг боболари қаҳрамон бўлганини кўрсатиш эканини айтган. Унинг фикрича, ҳар бир халқ ўз тарихини унутмаслиги керак.

Путин эса Тошкентда ташкил этилган Ғалаба музейи ва паркини юқори баҳолаб, у нафақат ўша давр руҳини, балки Ўзбекистон раҳбариятининг тарихга муносабатини ҳам акс эттиришини таъкидлаган.

Мирзиёевнинг сўзларига кўра, Victory Park бугун Ўзбекистондаги энг кўп ташриф буюриладиган масканлардан бирига айланган. У ерга ёшлар, талабалар, ўқувчилар ва турли ҳудудлардан келган одамлар мунтазам боради.

Президентнинг таъкидлашича, бу парк халқнинг истаги билан барпо этилган ва ҳар бир миллат учун ўз аждодларини ҳурмат қилиш ҳамда уларга муносиб бўлиш шараф масаласи ҳисобланади.

Эслатиб ўтамиз, аввалроқ Москвадаги Қизил майдонда ўтказилган Ғалаба паради тахминан 45 дақиқа давом этгани ва замонавий тарихдаги энг қисқа парадлардан бирига айлангани ҳақида хабар берилганди.