Путин Трампга Эрондаги уранни Россияга олиб чиқишни таклиф қилди – ОАВ

Россия Президенти Владимир Путин АҚШга Яқин Шарқдаги урушни тўхтатиш бўйича келишув доирасида Эрондаги бойитилган уран захираларини Россияга олиб чиқиб кетишни таклиф қилди. Бу ҳақда “Axios” хабар берди.

Нашр маълумотларига кўра, Путин ушбу таклифни жорий йилнинг 9 март куни АҚШ Президенти Дональд Трамп билан бўлган телефон мулоқоти чоғида илгари сурган. “Axios” манбаларига кўра, АҚШ Президенти бу таклифни рад этган.

АҚШ ва Исроил Эрондаги режимдан ядро қуроли яратишдан воз кечишни талаб қилиб, мамлакатга қарши уруш бошлаган эди. “Axios” ёзишича, Теҳрон ихтиёрида 60 фоизгача бойитилган тахминан 450 килограмм уран мавжуд. Ушбу захираларни бир неча ҳафта ичида қурол даражасидаги 90 фоизгача етказиш ва ўнта ядро бомбаси яратиш мумкин.

“Бу таклиф биринчи марта берилаётгани йўқ. У қабул қилинмади. АҚШнинг позицияси шундан иборатки, биз уран хавфсиз сақланишига тўлиқ амин бўлишимиз керак”, дейди Дональд Трамп маъмурияти вакили “Axios” нашрига.

Эслатиб ўтамиз, аввалроқ Россия Президенти Владимир Путин ва АҚШ Президенти Дональд Трамп ўртасида телефон орқали суҳбат бўлиб ўтгани ҳақида хабар берилган эди.