Путин Украинани эгаллашни давом эттириш ниятда

Россия Президенти Владимир Путин Украина ҳудудларини эгаллашни давом эттиришини ваъда қилди. Бу ҳақда у “India Today” ҳинд телеканалига берган интервьюсида маълум қилди.

Путиннинг сўзларига кўра, ўзини ўзи республика деб эълон қилган Донецк ва Луганск “халқ республикалари” (“ДНР” ва “ЛНР”) “барибир озод этилади”. 

“Ҳаммаси шу томон бормоқда. Ё биз бу ҳудудларни қуролли йўл билан озод қиламиз, ёки Украина қўшинлари бу ерларни тарк этиб, у ердаги урушни тўхтатади”, деган Владимир Путин.

Мазкур интервью Путиннинг Ҳиндистонга ташрифи олдидан тайёрланган бўлиб, ташриф бугун, 4 декабр куни бошланади.

Россия Президентининг таъкидлашича, Украинанинг ушбу минтақалари аҳолиси “мустақиллик учун овоз берган”. 

“Биз буни дарҳол Украинага, украин қўшинларига айтганмиз: одамлар сиз билан яшашни истамайди, қўшинларингизни чиқаринг ва ҳеч қандай ҳарбий ҳаракат бўлмайди. Йўқ, улар урушишни афзал кўрди, мана, энди бу нимага олиб келганини кўриб турибмиз”, деди Владимир Путин.

Донбасснинг тўлиқ равишда – Россия қўшинлари назоратига ўтмаган ҳудудларни ҳам ўз ичига олган ҳолда, Россия назоратига ўтиши Украинадаги урушни тўхтатиш бўйича АҚШ Президенти Дональд Трамп маъмурияти таклиф қилган режанинг пунктларидан бири ҳисобланади.

“Донбасс ва Новороссияни эгаллаш”

ТАСС интервью сарлавҳасида Путин ҳар қандай ҳолатда эгаллашни ваъда қилган Украина ҳудудлари “Донбасс ва Новороссия” деб аталган. Аммо “India Today” телеканалига берилган интервьюнинг ўзида Россия Президенти қайси ҳудудлар назарда тутилганини аниқ айтмаган. Матндан келиб чиқиб, Путин Донецк ва Луганск вилоятларини назарда тутгани хулоса қилиш мумкин.

Трамп томонидан таклиф қилинган 28 банддан иборат режага кўра, Украина таркибидаги Донецк ва Луганск вилоятларини Россия назоратига ўтказиш назарда тутилган. Шу билан бирга, Москва Запорожье ва Херсон вилоятларига ҳам даъвогар бўлиб келмоқда. 2014 йилда аннексия қилинган Қрим ва Луганск вилоятининг катта қисми аллақачон Россия назоратида. Украина эса ўз ҳудудларини топширишни рад этади, аммо фронтнинг ҳозирги чизиғи бўйича ўт очишни тўхтатиш масаласини муҳокама қилишга тайёрлигини билдирган.

АҚШ Трамп режасини тўрт “пакет”га ажратишни таклиф қилган

Путин шу интервьюда 2 декабрь куни Кремлда АҚШ Президентининг вакиллари Стив Уиткофф ва Жаред Кушнер билан учрашувда Россия Трампнинг урушни тўхтатиш режасидаги айрим бандларга рози бўлмаганини тасдиқлади. Унинг сўзларига кўра, томонлар ташаббуснинг ҳар бир бандини алоҳида кўриб чиққан ва қатор масалаларда келишувга эришилмаган.

“Бундай масалалар бўлди, биз уларни муҳокама қилдик, лекин бу осон иш эмас. Айрим нуқталар бўйича ҳа, муҳокама қилишимиз мумкин, дедик, бошқаларига эса рози бўломадик. Суҳбат айнан шундай тарзда кечди”, деди Путин.

Шунингдек, у АҚШнинг 28 банддан иборат дастлабки режаси “деярли ўзгармаганини”, аммо Вашингтон уни тўрт алоҳида “пакет”га бўлишни таклиф қилганини айтди. Аввалроқ Украина ва ЕИ вакилларининг Женевадаги учрашувидан сўнг бандлар сони 19 тагача қисқаргани ҳақида хабар берилган. Аммо 28 ва 19 бандни ўз ичига олган тўлиқ ҳужжатлар расман эълон қилинмаган.

Путин Уиткофф ва Кушнер билан ўтказилган учрашувни “жуда фойдали”, деб баҳолади. АҚШ Президенти Дональд Трамп ҳам музокараларга ижобий баҳо берган, аммо америкалик расмийлар учрашувнинг мазмуни юзасидан батафсил изоҳ бермаган.

Россия президенти шунингдек Москва­нинг “катта еттилик” (G7) форматига қайтишини назарда тутган АҚШнинг тинчлик режаси бандларидан бирини рад этди. Путиннинг айтишича, у Россия 2014 йилда G8дан чиқарилганидан анча олдин ҳам саммитларга деярли бормаган. У 2009–2012 йилларда саммитларда қатнашмагани рост, аммо бу йилларда Россия Президенти Дмитрий Медведев бўлган. Шунга қарамай, Путин 2013 йилги учрашувда иштирок этган.

4 декабрь куни маълум қилинишича, Владимир Путиннинг катта матбуот анжумани ва “тўғридан тўғри линия” 19 декабрь куни бўлиб ўтади.