“Реал” Вальверде ва Тчуамени жанжали юзасидан текширув бошлади

“Реал Мадрид” клуби уругвайлик ярим ҳимоячи Федерико Вальверде ва франциялик футболчи Орельен Тчуаменига нисбатан интизомий иш очилганини расман маълум қилди. Бу ҳақда клуб матбуот хизмати хабар берди.

Клуб баёнотида айтилишича, қарор асосий жамоа машғулотлари вақтида юз берган воқеалардан кейин қабул қилинган.

“Бугун эрталаб асосий жамоа машғулотлари пайтида содир бўлган воқеалардан сўнг, футболчиларимиз Федерико Вальверде ва Орельен Тчуамени устидан интизомий иш қўзғатилди. Клуб ички тартиб-қоидалар якунлангач, ҳар икки ҳолат бўйича қарорларни ўз вақтида эълон қилади”, дейилади “Реал Мадрид” баёнотида.

Аввалроқ ОАВда Вальверде ва Тчуамени машғулот базасида ўзаро тортишиб қолгани ҳақида хабарлар тарқалган эди. Маълумотларга кўра, қўполлик сабаб келиб чиққан можаро футболчиларнинг бир-бирини итариши ва жанжаллашиши билан давом этган. Орадан бир кун ўтиб вазият янада кескинлашгани айтилмоқда.

Хабарларга кўра, можаро вақтида бошқа футболчилар аралашишга мажбур бўлган, оқибатда Федерико Вальверде жароҳат олиб, шифохонага юборилган. Шундан сўнг “Реал Мадрид” раҳбарияти фавқулодда йиғилиш ўтказган.

ОАВнинг маълумотларига кўра, ҳар икки футболчи 3 та ўйиндан 20 тагача муддатга дисквалификация қилиниши, шунингдек, маошининг бир қисми ушлаб қолиниши мумкин. Бундан ташқари, клуб ички интизомий жазо чораларини ҳам қўллаши эҳтимолдан холи эмас.

Таъкидлаш жоиз, Ла Лига 35-турида “Реал Мадрид” сафарда “Барселона”га қарши майдонга тушади. Агар мадридликлар ушбу баҳсда очко йўқотса, каталонияликлар муддатидан олдин Испания чемпионлигини расмийлаштиради.

Маълумот учун, 27 ёшли Федерико Вальверде 2018 йилдан бери “Реал Мадрид” сафида ўйнаб келмоқда. У клуб билан уч марта Ла Лига, икки марта Чемпионлар лигаси, бир марта Қирол кубоги ва икки бор UEFA Суперкубогида ғолиб чиққан.

26 ёшли Орельен Тчуамени эса, 2022 йилда “Монако”дан “Реал Мадрид”га кўчиб ўтган. У мадридликлар сафида Ла Лига, Чемпионлар лигаси, Қирол кубоги ва икки марта UEFA Суперкубогини қўлга киритган.