Роналду сабабли “Ал-Наср” мураббийи ва футболчиларига интервью бериш тақиқланди

Саудия Арабистонининг “Ал-Наср” жамоаси раҳбарияти Саудия Про-лигасининг “Ар-Риёд”га қарши ўйини (1:0) олдидан ва ўйиндан кейин футболчилар ҳамда мураббийларга тезкор интервью беришни тақиқлади. Бу ҳақда “A Bola” хабар берди.

Манбага кўра, на бош мураббий Жорже Жесуш, на клуб футболчилари ўйиндан олдин ва кейин одатдаги оммавий ахборот воситалари олдидаги мажбуриятларини бажарган. 

Португалиялик мураббий Саудия Про-лигаси ўйинларидан олдинги анъанавий флаш-интервьюда ҳам, “Ар-Риёд”га қарши ўйиндан кейинги матбуот анжуманида ҳам қатнашмаган. Саудия ОАВ хабарига кўра, Жорже Жесуш ўйиндан кейин интервью бермагани учун узр сўраган.

Маълумотларга кўра, матбуот анжуманини ўтказмаслик “Ал-Наср” мураббийсига 6700 евродан ортиқ жарима келтириши мумкин.

Мутахассисларнинг билдиришича, бу воқеа клуб ишидан норози бўлган ва “Ар-Риёд”га қарши ўйинда қатнашишдан бош тортган Криштиану Роналдунинг бойкот эълон қилиши фонида содир бўлмоқда.

Эслатиб ўтамиз, аввалроқ “Ал-Наср” клуби ҳужумчиси, португалиялик Криштиану Роналду жамоанинг ҳозирги ҳолатидан норозилиги сабаб Саудия Арабистонини тарк этиши мумкинлиги ҳақида хабар берилган эди.