Роналдунинг трансфер нархи пастлади

Саудия Арабистонининг “Ал-Наср” клуби сафида тўп сураётган португалиялик юлдуз футболчи Криштиану Роналдунинг трансфер қиймати 12 миллион евродан 10 миллион еврога тушди. Бу ҳақда “Transfermarkt” портали хабар берди. 

“Transfermarkt” маълумотларига кўра, португалиялик юлдузнинг қиймати илк бор 2004 йилда 10 миллион евродан ошган ва ҳозирга келиб энди фаолиятининг сўнгига келиб яна шу нархга тушиб қолди.

Роналдунинг энг юқори трансфер қиймати 2014 ва 2018 йилда қайд этилган бўлиб, ўшанда у 120 миллион еврога баҳоланган. Бу даврда у “Реал Мадрид” сафида кетма-кет юқори даражада ўйин кўрсатиб, Чемпионлар лигасини қўлга киритган.

41 ёшли ҳужумчи 2025-2026 йилги мавсумда ҳам юқори самарадорлик намойиш этди. У чемпионатда 28 та гол уриб, “Ал-Наср”нинг энг яхши тўпурарига айланди.

Жорий йилнинг 21 май куни Саудия Арабистони чемпионатининг 34-туридан ўрин олган сўнгги учрашувда “Ал-Наср” ўз майдонида “Дамак”ни 4:1 ҳисобида мағлуб этиб, мамлакат чемпионлигини қўлга киритди.

Шу тариқа, Роналду фаолиятида илк бор Саудия Арабистони чемпионати ғолиби бўлди. Португалиялик футболчи “Ал-Наср” сафига 2023 йил январь ойида келиб қўшилган эди.

Эслатиб ўтамиз, аввалроқ “Transfermarkt” портали Абдуқодир Ҳусановнинг трансфер нархини 15 млн еврога кўтариб, 50 млн евро этиб белгилаганди.