Россия ХЖС ва махсус трибуналлар қарорларини инкор этиши мумкин

Россия Президенти Владимир Путин бугун, 29 декабрь куни Россия ҳудудида хорижий жиноий судлар қарорларини бажармасликка рухсат берувчи қонунни имзолади. Бу, жумладан, Халқаро жиноий суд ва махсус трибуналларга ҳам тааллуқли.

Қонун матнига кўра, Россия бошқа давлатлар иштирокида фаолият юритадиган, аммо Россия иштирок этмайдиган жиноий судлар қарорларини инкор этиш ҳуқуқига эга бўлади. Шунингдек, агар халқаро суд органининг ваколати Россия имзолаган халқаро шартнома ёки БМТ Хавфсизлик Кенгаши резолюциясига асосланмаган бўлса, у ҳам мазкур қонун доирасига киради.

2023 йил март ойида Гаагадаги Халқаро жиноий суд Владимир Путин ва Россия Президенти ҳузуридаги болалар ҳуқуқлари бўйича вакил Мария Львова-Беловага нисбатан ҳибсга олиш ордери чиқарган эди. Суд прокурорлари уларни Украинанинг босиб олинган ҳудудларидан болаларни қонунга хилоф равишда Россияга олиб чиқишда гумон қилмоқда. Россия 2000 йилда ХЖС фаолияти асоси бўлган Рим статутини имзолаган, аммо уни ратификация қилмаган. 2016 йилда эса Кремль ўз имзосини расман қайтариб олган.

2025 йил июнь ойида Украина Президенти Владимир Зеленский ва Европа Кенгаши Бош котиби Ален Берсе Украинага қарши тажовуз жиноятларини тергов қилиш учун махсус трибунал тузиш тўғрисидаги келишувни имзолаган эди. Ушбу трибуналнинг мақсади – Россия ва Беларусь сиёсий ҳамда ҳарбий раҳбариятини Украинадаги уруш жиноятлари учун жавобгарликка тортиш.

Бундан ташқари, Путин собиқ маҳкумлар учун дезертирликка оид жазони кучайтирди. Энди, агар улар қочиб кетса, 20 йилгача озодликдан маҳрум этилиши мумкин. Бу чора асосан Украинага қарши урушда иштирок этиш учун озод қилинган маҳкумларга тааллуқли.

Илгари бундай шахслар учун дезертирлик бўйича энг кўп жазо 15 йилни ташкил этар эди.