Россия Киевда Қатар элчихонасини ўққа тутди – Зеленский (видео)

Бугун, 9 январь куни Украина Президенти Владимир Зеленский Россиянинг “кенг кўламли” ҳужуми оқибатида Киев шаҳри ва унинг атрофида жойлашган 20 та турар жой биноси, шунингдек, Қатарнинг Украинадаги элчихонаси зарар кўрганини маълум қилди. Бу ҳақда у ўзининг Telegram-каналида ёзди. 

Зеленскийнинг маълум қилинишича, фақатгина тураржой биноларининг ўзига 20 марта зарба берилган. Шунингдек, Львов вилояти ва мамлакатнинг бошқа ҳудудларида ҳам зарбалардан кейинги тиклаш ишлари давом этмоқда.

“Афсуски, ҳозирги пайтга келиб фақат пойтахтнинг ўзида 4 нафар ҳалок бўлганлар борлиги маълум. Улар орасида тез ёрдам ходими ҳам бор. Марҳумларнинг яқинлари ва оила аъзоларига чуқур ҳамдардлик билдираман. Ўнлаб одамлар жароҳат олган. Киев расмийларига кўра, зарбалардан энг кўп зарар кўрган ҳудуд Киев бўлган. Оқибатда 4 киши ҳалок бўлган ва камида 25 киши жароҳатланган”, дейди Зеленский.  

Украина етакчиси, шунингдек, дрон зарбаси оқибатида Қатар элчихонасининг бир биноси ҳам зарар кўрганини қўшимча қилган. 

“Шу кеча Россия дрони томонидан оддий фуқаролик инфратузилмаси ва энергетика объектларидан ташқари, Қатарнинг элчихонаси биноси ҳам шикастланди. Бу – Россия билан воситачилик қилиб, ҳарбий асирлар ва Россия қамоқларида сақланаётган тинч аҳолининг озод этилиши учун катта саъй-ҳаракат қилаётган давлатдир”, деган у. 

Бундан ташқари, Зеленский ушбу ҳолат ортидан АҚШ ва бошқа иттифоқдошларидан ёрдам сўраган. 

“Дунёнинг аниқ ва қатъий реакцияси зарур, энг аввало, Россия ҳақиқатан ҳам ҳисоблашадиган Қўшма Штатлар томонидан. Россия дипломатияга эътибор қаратиш унинг мажбурияти эканини англаб етиши ва ҳар сафар қотилликлар ҳамда инфратузилмани вайрон қилишга қайтганида бунинг оқибатларини ҳис қилиши керак”, дейди Украина раҳбари. 

Эслатиб ўтамиз, аввалроқ Россия Қуролли кучлари Украинанинг Львов шаҳрига “Орешник” ракетаси ёрдамида кучли зарба бергани ҳақида хабар берилган эди. Бу ҳаракат 2025 йил 29 декабрдаги Россия Президенти Владимир Путиннинг Новгород вилоятидаги қароргоҳига уюштирилган ҳужумга жавобан амалга оширилган.