Rossiyalik askarlar ochlikdan odam go‘shtini yeyapti – OAV

Rossiya armiyasida yuzaga kelgan oziq-ovqat tanqisligi tufayli kannibalizm (odam yoki hayvonning o‘z turiga mansub boshqa individni yeyishi) holatlari qayd etildi. Bu haqda “The Sunday Times” habar berdi.

Ma’lum qilinishicha, Ukrainaga bostirib kirishda ishtirok etgan bir necha rus harbiy xizmatchilari oziq-ovqat tanqisligi sababli kannibalizmga murojaat qila boshlagan. Nashr Ukraina harbiy razvedkasi materiallari, shu jumladan fotosuratlar va rus zobitlari o‘rtasidagi o‘nga yaqin audio xabarlarni asos qilib olgan. Shuningdek, xabarda o‘z o‘rtoqlarini yeb qo‘ygan kamida beshta holat haqida gap borgan. 

Qayd etilishicha, holatlardan biri 2025 yil noyabr oyida Donetsk viloyati Mirnograd hududida sodir bo‘lgan. Taqdim etilgan dalillarga ko‘ra, 95-alohida gvardiya motorli miltiq brigadasining 51-alohida qo‘riqchilarining 51-polkida xizmat qilgan “Cho‘loq” chaqiruv belgisi bilan piyoda askar ikki hamkasbini o‘ldirgan va ulardan birining oyog‘ini yeyishga harakat qilgan. 

Bu bo‘yicha noma’lum ofitser brigada razvedka bataloni komandirining o‘rinbosari Vladislav Razikovga Telegram orqali xabar bergan. Shuningdek, u tasvirlarni, shu jumladan kesilgan oyoqning fotosuratini ham yuborgan. 

Aytilishicha, tasvirlar maxsus dasturiy ta’minot yordamida tahlil qilingan. Tasvirni o‘rgangan mustaqil harbiy jarrohning ta’kidlashicha, jarohatlar jangovar jarohatlarga o‘xshamaydi va ehtimol o‘tkir narsa bilan kesish orqali yetkazilgan. 

Mavjud ovozli xabarlarda ofitser odam go‘shtini yemoqchi bo‘lgan askar podvaldan topilganligini da’vo qilgan. Uning so‘zlariga ko‘ra, askarni ushlamoqchi bo‘lganida, u o‘t ochgan va o‘sha yerda o‘ldirilgan.  

Bundan tashqari, ofitser uning askarlari ochlikdan va qattiq charchaganidan shikoyat qilgan. Boshqa qo‘lga kiritilgan suhbatlarda ham kannibalizm holatlari qayd etilgan. Xususan, o‘tgan yilning aprel oyida “Most” chaqiruv belgisi bo‘lgan askar qo‘mondonga inson go‘shtini iste’mol qilgan hamkasbi haqida shikoyat qilgan. 

Shuningdek, 2025 yil oktyabr oyida 1437-motorli miltiq polkining qo‘mondoni shunga o‘xshash harakatlarda bo‘ysunuvchini ayblagan va “odamlarni yeyishni” to‘xtatishni talab qilgan.

Yana bir boshqa xabarda 55-motorli miltiq brigadasi boshlig‘i alkogol va giyohvand moddalar bilan birga kannibalizmni aniq taqiqlovchi buyruq chiqargani ham ma’lum bo‘lgan.

Ukraina tomoni ham qo‘lga olingan rus askarlari oziq-ovqat yetishmasligini da’vo qilayotganini aytgan. Shuningdek, AQSH harbiy-dengiz kuchlarining sobiq kapitani Bredli Martin Rossiya armiyasida ta’minot bilan bog‘liq muammolar haqidagi xabarlar ishonchli ekanini aytib, qo‘shinlarni qo‘llab-quvvatlash Rossiya qo‘mondonligi uchun ustuvor vazifa emasligini qayd etgan.

Shahzoda Shukurullayeva