Руминиянинг биринчи президенти вафот этди

Кеча, 5 август куни Руминиянинг биринчи президенти Ион Илиеску шифохонада деярли икки ой ётганидан сўнг 95 ёшида вафот этди. Бу ҳақда мамлакат ҳукумати хабар берди.

“Руминиянинг собиқ президенти Ион Илиескунинг вафоти ҳақида чуқур қайғу билан хабар қиламиз. У 2025 йил 5 август куни профессор Агриппа Ионеску номидаги тез тиббий ёрдам клиникасида вафот этди. Руминия ҳукумати марҳумнинг оиласи ва яқинларига ҳамдардлик билдиради”, дейилади расмий баёнотда.

Тиббиёт маркази маълумотига кўра, Илиескунинг ўлими маҳаллий вақт билан 15:55 да юз берган. Шифохона вакиллари унинг 57 кун давомида даволанганини, шу вақт ичида шифокорлар барча зарур ёрдам ва парваришни кўрсатганини қайд этган.

Руминия Бош вазири Илие Боложан Илиеску бошқаруви даврида мамлакат тараққиётига катта таъсир кўрсатган қарорлар, жумладан, Снагов декларацияси ва Конституцияни қайта кўриб чиқиш тўғрисидаги қонун қабул қилинганини эсга олган. Ҳукумат марҳум президент билан видолашув маросими тафсилотлари кейинроқ эълон қилинишини билдирган.

Маълумот учун, Илиеску 1930 йил 3 март куни Руминиянинг кичик Олтеница шаҳарчасида туғилган. Бухарест политехника институтини ва Москва энергетика институтини тамомлагач, 1950 йилларда сиёсатга кириб келган ва Руминия коммунистик партиясига аъзо бўлган. У икки бор президентлик лавозимида ишлаган: 1990-1996 йилларда, собиқ президент Никола Чаушеску ҳокимиятдан ағдарилгач, 2000-2004 йилларда.

2017 йилда Илиескуга инсониятга қарши жиноятлар бўйича айблов қўйилган. Бунда гап 1990 йил июнь ойида Бухарестда кончиларнинг норозилик намойишларини куч билан бостирилиши ҳақида кетади. Ўшанда тўрт киши ҳалок бўлган, мингдан ортиқ одам жароҳат олган. Илиеску ва яна икки нафар айбланувчи иш судга юборилишининг қонунийлигига эътироз билдирган ва БМТ Халқаро жиноий суди уларнинг апелляциясини қаноатлантирган.

Жорий йилнинг июнь ойи бошида Илиеску жонлантириш бўлимига ётқизилганди. Ўшанда собиқ президентда ўпка саратони аниқланган. Шундан бери у шифокорлар назоратида бўлган.

Эсалтиб ўтамиз, аввалроқ дунёдаги энг камбағал ва камтар президент ўлароқ танилган Уругвайнинг собиқ президенти (2010-2015) Хосе Мухика қизилўнгач саратони туфайли 89 ёшида вафот этганди.