Шимолий Кореяда “кибрланган“ тадбиркор жуфтлик қатл этилди

Шимолий Кореяда бизнеси муваффақиятга эришгач, “кибрланиб кетган” икки тадбиркор “аксилреспублика фаолияти”да айбланиб, қатл этилди. Бу ҳақда “Daily Mail” хабар берди.

Қайд этилишича, Пхеньянда ўтказилган қатлни юзлаб одамлар, ҳатто болалар ҳам мажбуран томоша қилган. Ёши 50 атрофидаги тадбиркорлар электровелосипедлар, аккумуляторли мотоцикллар учун қисмлар ва оддий велосипедларни сотиш, таъмирлаш ҳамда ижарага бериш билан шуғулланган. Улар расман Садонг тумани касаба уюшмалари федерацияси орқали рўйхатдан ўтган бўлса-да, катта даромад топгани сабаб “катта раҳбарлар” сифатида танилган.

Маҳаллий аҳолининг бир қисми жуда қиммат нарх қўйиши, маҳсулот сифати пастлиги ва кибрли муомаласи сабаб улардан норози бўлган. Оқибатда Шимолий Корея тадбиркорлари “Реакцион фикр ва маданиятни қабул қилмаслик тўғрисида”ги қонунни бузганликда айбланган. Шунингдек, уларга чет эл валютасини ноқонуний айлантириш ва давлатга қарши хабарларни тарқатиш мақсадида ташқи ташкилот билан ҳамкорлик қилиш айблови ҳам қўйилган.

Улар август бошида ҳибсга олинган, сўроқ қилинган ва сентябрь бошида ўлим жазосига ҳукм қилинган. Уларга алоқадор 20 га яқин одам эса сургунга ёки меҳнат лагерида “қайта тарбиялашга” жўнатилган. Хабарга кўра, қатл очиқ майдонда амалга оширилган ва аҳолига мажбурий равишда қатнашиш буюрилган.

“200 дан ортиқ одам тўпланди, болалар ҳам олиб келинди, ўқувчилар дарсдан озод қилиниб, қатлни кузатишга мажбур бўлди”, дейилади хабарда.

Расмийлар қатл иқтисодий тартибсизликнинг олдини олиш ва аҳолига сабоқ бўлиши учун амалга оширилганини билдирган. Ҳодиса давлатнинг хусусий бизнес устидан назоратни янада кучайтириши ҳамда ташқи алоқаларни қатъий чеклашга уриниши сифатида талқин қилинган.

Қатлнинг вақти ҳам эътиборни тортди, у КХДР раҳбари Ким Чен Иннинг Хитой сафаридан қайтганидан кўп ўтмай амалга оширилган. Манбаларга кўра, бу чет эл билан ҳамкорлик қилинса ҳам ички интизомдан четга чиқиб бўлмаслиги ҳақидаги огоҳлантирувчи сигнал бўлган.

“Мақсад давлат рухсат берган чегарадан ҳатто бир қадам ташқарига чиқадиган ҳар ким жазоланиши мумкинлигини кўрсатишдир. Барча тадбиркорлар биз ҳам исталган пайт қўлга олиниб, қатл этилишимиз мумкин, деган қўрқувга тушди”, дейди манбалардан бири.

Ҳодисадан сўнг бозордаги савдо фаоллиги бир неча кунга кескин пасайган. Тадбиркорларга алоқадор корхоналар банкрот бўлган, аккумулятор ва унинг қисмлари нархи кескин ошган ёки савдо буткул тўхтаган.

Эслатиб ўтамиз, аввалроқ Малида “Жамоат нусрат ал-ислом вал-муслимин” (ЖНИМ) террор гуруҳи аъзолари машҳур тиктокер, Мали армиясини жангариларга қарши курашда қўллаб-қувватлаб келувчи Мариям Сиссени ўғирлаб кетиб, намойишкорона қатл этганди.