“Сити” Премьер-лига чемпионлигидан маҳрум қилиниши мумкин

Аввалроқ, “Манчестер Сити” молиявий қонунбузарликларда айбланаётгани ҳақида хабар берилган эди. Клуб ушбу қоидабузарликларда айбдор деб топилса, клубнинг иккита Англия Премьер-лигаси чемпионлиги бекор қилиниши мумкин. Бу ҳақда Topskills Sports UK нашри хабар берди.

Манбага кўра, агар “Манчестер Сити” молиявий фейр-плей қоидаларини бузиш бўйича қўйилган 115 та айблов юзасидан айбдор деб топилса, клубга жиддий санкциялар қўлланилиши мумкин. Жумладан, очколар олиб ташланиши ёки клубнинг қуйи лигага туширилиши эҳтимоли ҳам мавжуд.

Агар шундай чоралар кўрилса, “шаҳарликлар”нинг икки мавсумдаги чемпионлик унвонлари “Ливерпуль”га берилиши мумкинлиги айтилмоқда. 

Гап 2018-2019 ва 2021-2022 йилги мавсумлар ҳақида кетмоқда. 2018-2019 йилги мавсумда “Ливерпуль” 97 очко жамғариб, “Манчестер Сити”дан кейин иккинчи ўринни эгаллаган эди. 2021-2022 йилги мавсумда эса мерсисайдликлар 92 очко билан яна “шаҳарликлар” ортида иккинчи поғонани банд қилган.