Соболенко яна Рибакина билан тўқнаш келади

Дунёнинг биринчи рақамли теннисчиси Арина Соболенко Майами шаҳрида ўтказилаётган, соврин жамғармаси 9,4 миллион доллардан ортиқ бўлган WTA 1000 тоифасидаги турнирнинг ярим финалига йўл олди. Бу босқичда Соболенко дунёнинг иккинчи рақамли ракеткаси Елена Рибакина билан кортга чиқади.

Чорак финал баҳсида Соболенко америкалик Хейли Баптистни 6/4, 6/4 ҳисобида мағлуб этди. Учрашув 1 соат 20 дақиқа давом этди.

Рибакина эса чорак финалда америкалик Жессика Пегула (рейтингда 5-ўрин) билан тўқнаш келди. Учрашув уч сет давом этди ва Рибакинанинг 2/6, 6/3, 6/4 ҳисобидаги ғалабаси билан якунланди. Баҳс 2 соат 16 дақиқа давом этди.

Шу тариқа, жорий йил ҳисобидан учинчи бор дунёнинг биринчи ва иккинчи ракеткаси Соболенко ва Рибакини тўқнашуви бўлиб ўтади. Ушбу тўқнашув эртага, 27 март кунига белгиланган. Маълумот учун, Соболенко ушбу турнирнинг амалдаги чемпиони ҳисобланади.

Ушбу жуфтлик жорий йилнинг январь ойида “Australian open” финалида тўқнаш келган эди. Унда қозоғистонлик теннисчи ғалаба қозонган бўлса, Соболенко жорий йилнинг март ойида бўлиб ўтган Индиан-Уэллс турнири финалида Рибакинани мағлуб этиб, бош совринни қўлга киритган эди.

Турнир финалига йўлланма учун иккинчи ярим финалда эса америкалик Коко Гауфф ҳамда чехиялик Каролина Мухова ўзаро баҳс олиб боради.