Жокович турнирларни бойкот қилишга тайёр бўлган теннисчиларни қўллаб-қувватлади

Эркаклар ўртасидаги яккалик баҳсларида энг кўп “Катта дубулға” турнирлари ғолиби бўлган сербиялик теннисчи ҳамда Профессионал теннисчилар уюшмаси (PTPA) асосчиларидан бири Новак Жокович мукофот пули масаласида норозилик билдираётган ва мусобақаларни бойкот қилишни кўриб чиқаётган теннисчиларни қўллаб-қувватлашини маълум қилди. Бу ҳақда у “Punto de Break” нашрига берган интервьюсида сўз очди.

“Ўйинчилар мени доим қўллаб-қувватлашимни билишади. Янги авлод етишиб чиқяпти ва мен Соболенко каби етакчиларнинг масъулиятни ўз зиммасига олаётганидан мамнунман. Улар теннис тизими қандай ишлашини, унинг мураккаб жиҳатларини ва нафақат ўзлари, балки барча ўйинчилар манфаатини тушунишга ҳаракат қилмоқда. Мен ҳозир бу жараёнларни ташқаридан кузатяпман. Учрашув ва муҳокамаларда иштирок этмадим, аммо менинг позициям аниқ – мен ўйинчиларни қўллаб-қувватлайман ва уларнинг спорт тизимидаги мавқеини мустаҳкамлаш учун курашаман”, дейди Жокович. 

Аввалроқ, дунёнинг етакчи 20 нафар теннисчиси, жумладан, аёллар ўртасида биринчи рақамли спортчи Арина Соболенко ҳам “Роланд Гаррос” мукофот жамғармаси оширилмаганидан норози бўлиб, ташкилотчиларга мурожаат хати имзолаган эди. Кейинчалик Соболенко агар аёл теннисчилар учун мукофот пули улуши оширилмаса, бойкотга тайёр эканини билдирган.

“Аввал менинг сўзларим кўпинча нотўғри талқин қилинган, гўёки мен фақат ўзим учун кўпроқ пул сўраётгандек кўрсатилган. Аммо гап паст рейтингдаги теннисчилар ҳақида кетмоқда – улар маблағ етишмаслиги сабаб спортни тарк этишга мажбур бўлмоқда. Биз профессионал теннисда қуйи даражадаги ўйинчилар учун етарли молиявий кафолатлар йўқ бўлган ягона глобал спорт туримиз. Сўнгги йилларда бу ҳолат ўзгарганми ёки йўқми, аниқ билмайман”, дея қўшимча қилган Новак.

Маълумот учун, Новак Жокович 38 ёшда бўлиб, эркаклар яккалик баҳсларида рекорд ҳисобланган 24 та “Катта дубулға” (“Ролан Гаррос” – 3 марта, “Уимблдон” – 7 марта, “USA Open” – 4 марта, “Avstralian Open” – 10 марта) совринини қўлга киритган.