Трамп АҚШнинг “олтин флоти”ни яратишни эълон қилди (видео)

north_east

Франция Европадаги энг йирик атом авиаташувчини қуради

АҚШ “мутлақо янги синф”га мансуб иккита ҳарбий кема қуришга қарор қилди. Улар гипертовушли қуроллар ва лазерлар билан жиҳозланади, ядровий қурол ва қанотли ракеталарни олиб юриш имконига эга бўлади. Бу ҳақда АҚШ Президенти Дональд Трамп кеча, 22 декабрь куни Флоридадаги Мар-а-Лаго қароргоҳида бўлиб ўтган маросимда сўз очди. 

Трампнинг айтишича, ушбу флот дастлаб 10 та кемадан иборат бўлади, келажакда эса уларнинг сони 20–25 тага етказилади.

“Ҳарбий кемалар энг юқори даражадаги тўплар ва ракеталар билан қуролланади. Уларда, шунингдек, гипертовушли қуроллар, замонавий электр рельсотронлари ва ҳатто кучли лазерлар бўлади. Бундан ташқари, улар ҳозир ишлаб чиқилаётган денгиз базасидаги ядровий қуроллар ва қанотли ракеталарни ҳам олиб юради”, деган Трамп. 

Трампнинг таъкидлашича, сув сиқими 30–40 минг тонна бўлган бу кемалар АҚШ ҳарбий-денгиз флотининг флагманларига айланади. Қурилиш учун 26 миллиард доллар сарфлаш режалаштирилган. Америка етакчиси кемалар алюминийдан эмас, балки пўлатдан қурилишини таъкидлади. Қурилишни яқин орада бошлаш режалаштирилган бўлиб, у тахминан 2,5 йил давом этади.

Унинг баҳосига кўра, янги кемалар “жаҳон тарихидаги энг йирик кемалар” бўлади. Уларнинг дизайнини Ҳарбий-денгиз кучлари Трампнинг ўзи билан биргаликда ишлаб чиқади, чунки у ўз сўзларига кўра, “жуда эстетик дидга эга инсон”.

Шунингдек, АҚШ Президенти яна 15 та янги сувости кемаси қурилиши ҳақида ҳам маълум қилган. Унинг айтишича, ҳозирда Вашингтон ихтиёрида 30 дан ортиқ сув ости кемаси мавжуд.

Трамп бир неча бор АҚШ Ҳарбий-денгиз кучлари кемаларининг ташқи кўринишини танқид қилиб, “хунук кемалар” ёқмаслигини айтган. Унинг фикрича, яъни кам ҳаракат қиладиган кемалар албатта хунук бўлиши шарт эмас. Шунингдек, Президент АҚШ Ҳарбий-денгиз кучларига 19 та янги кема, жумладан, сувости кемалари, эсминецлар ва десант кемалари етказиб бериш режалари борлигини эслатган.

Эслатиб ўтамиз, жорий йилнинг 20 ва 21 декабрь кунлари АҚШ ҳарбийлари Венесуэла қирғоқлари яқинида икки кемани қўлга олгани ҳақида хабар берилганди.