Трамп BBC’ни судга берди

АҚШ Президенти Дональд Трамп Британиянинг BBC телерадиокорпорациясини туҳматда айблаб, судга мурожаат қилди. У 5 миллиард доллар миқдорида товон пули ундиришни талаб қилмоқда. Бу ҳақда “Reuters” хабар берди.

Даъво 2021 йил январида унинг тарафдорлари Капитолийга бостириб кирган куни Трамп томонидан айтилган нутқнинг Панорама дастурида таҳрирланиб эфирга узатилгани билан боғлиқ.

BBC ҳужжатли фильмида Президент Трампнинг “ёлғон, туҳматли, чалғитувчи, камситувчи, қўзғатувчи ва ёвуз образи” яратилгани айтилмоқда. Даъво аризасида фильм “сайловлар натижасига аралашиш ва уларга Президент Трамп зарарига таъсир кўрсатишга очиқчасига уриниш” доирасида тайёрлангани таъкидланади.

ОАВнинг ёзишича, ўтган йили эфирга узатилган “Трамп: Иккинчи имконият?” ҳужжатли фильмида Трамп нутқининг икки турли қисми монтаж қилинган ва оқибатда у гўёки Капитолийдаги тартибсизликларга тўғридан тўғри даъват қилгандек таассурот уйғотган. 

BBC Кенгаши раиси Самир Шаҳ юз берган ҳолат учун узр сўраб, нутқ Панорама томошабинлари Президент Трампнинг мурожаати тарафдорлари томонидан қандай қабул қилинганини ва ўша пайтда нималар содир бўлганини яхшироқ тушуниши учун таҳрирланганини айтган.

Эслатиб ўтамиз, ушбу можаро фонида Британия телерадиокорпорацияси бош директори Тим Дейви ҳамда BBC News раҳбари Деборра Тернес лавозимидан истеъфога чиққанди.