Трамп Эрдўған билан дунё муаммоларини муҳокама қилди

Туркия Президенти Ражаб Тойиб Эрдўған америкалик мавқедоши Дональд Трамп билан мулоқот қилди. Бу ҳақда Оқ уй раҳбари ўзининг Truth Social ижтимоий тармоғида ёзиб қолдирди.

Маълум қилинишича, суҳбат чоғида Трамп ва Эрдўған билан Украина масаласини муҳокама қилган ва Туркия етакчиси АҚШнинг можарони тугатиш ёндашувини қўллаб-қувватлаган.

Шунингдек, Эрдўған Трамп билан суҳбат чоғида АҚШ ва Эроннинг музокаралар жараёнини юқори баҳолаган. Икки ўртадаги мулоқотда Сурия ва Ғазо масалалари ҳам айро бўлиб қолгани йўқ. Трампнинг ёзишича, унинг ўтган даврдаги президентлик йилларида ҳам Эрдўған билан муносабатлари аъло даражада бўлган.

Қолаверса, Эрдўған Трампни Туркияга, Трамп эса уни Вашингтонга таклиф қилган.

Бундан ташқари, Эрдўған ва Трамп Туркия ва АҚШ ўртасидаги икки томонлама муносабатларни муҳокама қилган. Туркия раҳбарининг таъкидлашича, Анқара Вашингтон билан кўплаб соҳаларда, шу жумладан мудофаа саноатида янада ҳамкорликни ривожлантиришга умид қилмоқда.

Эслатиб ўтамиз, аввалроқ Туркия Президенти Ражаб Тойиб Эрдўған ва АҚШ Президенти Дональд Трамп ўртасида кутилаётган учрашув Америка раҳбарининг қароргоҳи бўлмиш Оқ уйда ёки Туркияда бўлиши мумкинлиги ҳақида хабар берилган эди.