Трамп Эрон билан уруш қайта бошланишига шама қилди

АҚШ Президенти Дональд Трамп Эрон билан олиб борилаётган музокаралардан норози. Америка ҳарбийлари мамлакатда ҳарбий ҳаракатларни қайта бошлаши мумкин. Бу ҳақда Трамп кеча, 27 май куни Оқ уйда бўлиб ўтган Вазирлар маҳкамаси йиғилишида сўз очди.

АҚШ Президентининг сўзларига кўра, Теҳрон ҳозирда низони тўғридан тўғри ҳал қилишга тайёр, бироқ Вашингтонга Эрон расмийлари интилаётган шартлар ёқмаяпти.

“АҚШ ё ўзини қониқтирадиган келишувга эришади, ёки ишни охирига етказиб қўяди. Кўрамиз, нима содир бўларкин”, дейди Трамп Эрон билан урушнинг қайта бошланишига шама қилиб.

Бундан ташқари, Қўшма Штатлар Президенти Эрон ўзининг юқори даражада бойитилган уран захираларини топшириши эвазига Америка санкцияларининг юмшатилишини кўзда тутувчи вариант уни қониқтирмаслигини таъкидлаган. Трампнинг сўзларига кўра, Теҳрон “юқори даражада бойитилган уранни топширади, аммо бу санкцияларнинг юмшатилиши эвазига бўлмайди”.

Эслатиб ўтамиз, аввалроқ Дональд Трамп CBS телеканалига берган интервьюсида Вашингтон ва Теҳрон урушни тўхтатиш бўийча келишувга анча яқинлашиб қолганини айтган эди. Бироқ кейинроқ Эрон Ташқи ишлар вазирлиги вакили Исмоил Бағоий АҚШ билан музокараларда маълум натижаларга эришилганини, аммо келишув имзоланиши ҳали яқин эмаслигини билдирди.