Байденнинг аудиоёзувлари янги сиёсий можарога сабаб бўлди

АҚШ собиқ президенти Жо Байден мемуарлар (эсдаликлар) учун ёзиб олинган шахсий суҳбатларининг аудиоёзувлари эълон қилинишини тақиқлаш мақсадида судга мурожаат қилди. Амалдаги Президент Дональд Трамп эса собиқ президентнинг ушбу қарорини танқид қилди. Бу ҳақда “Reuters” хабар берди.

Қайд этилишича, Жо Байден Адлия вазирлигига қарши даъво аризаси билан чиққан. У Конгрессдаги республикачиларга ўзининг 2016-2017 йилларда мемуар муаллифи билан ўтказган суҳбатлари аудиоёзувларини топширишни муддатсиз тақиқлашни талаб қилмоқда.

Даъво аризасида айтилишича, Байден мазкур материалларнинг республикачилар назоратида бўлган Вакиллар палатасининг Юридик қўмитасига ошкор қилинишига қарши чиқмоқда.

Гап китоб тайёрлаш билан боғлиқ бўлган суҳбатлар ҳақида бормоқда. Собиқ президентнинг сўзларига кўра, суҳбатларда жуда шахсий ва нозик мавзулар, жумладан, 2015 йилда онкологик касаллик туфайли вафот этган тўнғич ўғли Бо Байденнинг ўлими ҳақида сўз борган.

“Даъвогар Жозеф Байден суддан Адлия вазирлиги томонидан материалларнинг қўмитага ошкор қилинишига муддатсиз тақиқ қўйишни сўрайди”, дейилади ҳужжатда.

Адлия вазирлиги ушбу материалларни 2023 йилда Байденнинг махфий ҳужжатлар билан ноқонуний муомала қилгани бўйича олиб борилган тергов давомида қўлга киритган. Ўшанда вазирлик жиноий таъқиб учун асослар йўқ деган хулосага келган.

Байденнинг билдиришича, ёзувларнинг эълон қилиниши унинг шахсий ҳаёт дахлсизлиги ҳуқуқини бузади. Даъво аризасида, шунингдек, илгари Адлия вазирлиги ҳам худди шундай позицияда бўлгани, бироқ Дональд Трамп ҳокимиятга қайтганидан кейин ўз қарорини ўзгартиргани ва февраль ойида аудиоёзувлар ҳамда уларнинг матнли нусхаларини (стенограммаларини) 15 июнь куни қонун чиқарувчиларга топшириш ниятида эканлигини маълум қилгани айтилади.

Дональд Трамп ўзидан олдинги президентнинг ушбу даъвосига муносабат билдирди. АҚШ Президенти Байденни ўзининг “Truth Social” ижтимоий тармоғида танқид қилди.

“Инсофсиз сиёсатчи”, деб ёзган Трамп ва Байденнинг судга берган даъвоси ҳақидаги хабар ҳаволасини илова қилган.