Трамп Эронга қўшин ҳам юбориши мумкин

АҚШ Президенти Дональд Трамп Эронга зарурат туғилса, қуруқлик қўшинлари юборилиши мумкинлигини истисно қилмади. Бу ҳақда у кеча, 2 март куни “The New York Post” нашрига интервьюсида интервьюсида айтиб ўтди.

Унинг сўзларига кўра, одатда президентлар “қуруқлик қўшинлари бўлмайди” дейди, аммо у бундай демаслигини таъкидлаган.

“Эҳтимол, бунга эҳтиёж бўлмас. Лекин агар зарурат туғилса, қўшин юборилиши мумкин”, деган Оқ уй раҳбари.

Трамп, шунингдек, “Daily Mail” нашрига интервьюсида Эрон билан можаро тахминан тўрт ҳафта давом этишини айтган. Бироқ кейинчалик у бу муддат қисқариши мумкинлигига ишора қилган.

“Ҳаммаси жуда тез содир бўлади. Биз жадвалдан анча илгарилаб кетдик: 49 нафар юқори лавозимли эронлик раҳбар йўқ қилинди. Бу иш учун камида тўрт ҳафта керак бўлади, деб ўйлаган эдик, аммо барчасини бир кунда амалга оширдик”, деган Трамп.

Шу билан бирга, Трамп Оқ уйда турли урушларда иштирок этган уч нафар ҳарбий хизматчига Президентлик шараф медалини топшириш маросимида сўзга чиқиб, уруш давомийлигининг ҳар қандай муддатини “нормал ҳолат” деб атаган. Унинг таъкидлашича, АҚШ армияси жанг ҳаракатларини талаб этилса, шунча вақт давом эттиришга тайёр.

“Дастлаб тўрт-беш ҳафта деб режалаштирган эдик, аммо бизда анча узоқ даврга етарли имкониятлар бор”, деган у.

Трамп урушнинг тўртта асосий мақсадини ҳам санаб ўтган: Эроннинг ракета салоҳиятини заифлаштириш, мамлакат ҳарбий-денгиз кучларини йўқ қилиш, Теҳроннинг ядровий қуролга эга бўлишининг олдини олиш ва унинг прокси кучларини тийиб туриш.

АҚШ маъмуриятининг фикрича, бу вазифа Эрон томонидан хориждаги “террористик армиялар”ни қуроллантириш, молиялаштириш ва бошқариш имконини бартараф этиш орқали амалга оширилади.

Шунингдек, у АҚШ Эрон халқига мамлакат назоратини амалдаги режимдан қайтариб олишда ёрдам бериш бўйича қўшимча чоралар кўраётганини ҳам айтган.

“Ҳақиқатан ҳам шундай қиляпмиз. Аммо ҳозирча барча уйида қолиши керак. Кўча хавфсиз эмас”, деган АҚШ етакчиси.