Трамп Эронга мамлакатни биргаликда бошқаришни таклиф қилди

АҚШ Президенти Дональд Трамп уруш тугаганидан кейин Эрон бошқарувида АҚШ иштирок этиши мумкинлигини айтди. Трампнинг бу ҳақдаги сўзларини “The Telegraph” нашри келтирди.

Унинг сўзларига кўра, тинчлик музокаралари фонида Эронда жуда жиддий режим ўзгариши юз бериши мумкин ва эҳтимол қўшма бошқарув яратилади, бунда Вашингтон ҳам иштирок этади. Трамп, ҳатто Ҳормуз бўғози устидан назорат “мен ва Оятуллоҳ қўлида бўлади” деб ҳазил аралаш таъкидлаган.

Шунингдек, у АҚШ Эронга янги раҳбарни танлашда ҳам иштирок этишни хоҳлашини билдирган. Трамп бунга мисол сифатида Венесуэладаги вазиятни келтириб, у ерда ҳокимият алмашганини эслатган.

Олдинроқ, Трамп Эроннинг эҳтимолий келажак раҳбарлари ҳақида гапириб, Мужтабо Ҳоманаий номзодини АҚШ учун “қабул қилиб бўлмайдиган” деб баҳолаган ва агар эски сиёсат давом этса, яна уруш бўлиши мумкинлигини айтган. У ўзида Эронни бошқариш учун “учта яхши номзод” борлигини, лекин уларнинг исмини ошкор қилмаслигини ҳам қўшимча қилган.

Манбаларга кўра, АҚШ урушни 9 апрелга қадар якунлашни режалаштирмоқда. Шу билан бирга, ОАВ хабарларига кўра, АҚШ ва Эрон делегациялари яқин кунларда Исломободда учрашув ўтказишга тайёргарлик кўрмоқда.

Қайд этиш жоиз, аввалроқ Трамп икки кунлик жуда яхши ва самарали музокаралар бўлиб ўтганини айтиб, Эрон энергетика объектларига зарбаларни 5 кунга тўхтатишни буюрганини билдирган эди. Унинг сўзларига кўра, томонлар Яқин Шарқдаги ҳарбий ҳаракатларни тартибга солиш масаласини муҳокама қилган. Аммо Эрон Президенти Масъуд Пезешкиён АҚШ билан музокаралар бўлаётгани ҳақидаги Президент Дональд Трампнинг баёнотларини рад этган.