Tramp Germaniya kansleri bilan uchrashdi. Mers nimadan xavotirda? 

Kecha, 3 mart kuni AQSH Prezidenti Donald Tramp Oq uyda Germaniya kansleri Fridrix Mersni qabul qildi. Oval kabinetda bo‘lib o‘tgan uchrashuvda Eronga qarshi davom etayotgan AQSH–Isroil harbiy operatsiyalari, Rossiya-Ukraina urushi, shuningdek, savdo va xavfsizlik masalalari muhokama qilindi. Bu haqda Oq uy xabar berdi.

Germaniya Eronga qarshi operatsiyalarda qanday yordam beryapti?

Tramp jurnalistlar bilan suhbatda Germaniya AQSH kuchlariga ayrim harbiy bazalardan foydalanishga ruxsat berish orqali yordam berayotganini ma’lum qildi. Uning ta’kidlashicha, Berlin qo‘shin yubormagan, biroq logistika jihatdan qulaylik yaratmoqda. AQSH Prezidenti Germaniyaning bu pozitsiyasini yuqori baholab, Mersni a’lo darajadagi yetakchi deb atagan. Bunga javoban, kansler Germaniya va AQSH Eronning hozirgi rejimiga chek qo‘yish masalasida bir fikrda ekanini bildirgan. Shu bilan birga, u harbiy harakatlar oqibatlari haqida ogohlantirgan. Mersning aytishicha, na AQSH, na Isroil Germaniyadan mojaroga bevosita qo‘shilishni so‘ramagan. Agar bunday masala ko‘tarilsa, Germaniya parlamentining rasmiy roziligi talab qilinadi.

Eron bilan bog‘liq urush Germaniya ichida siyosiy jihatdan nozik masala hisoblanadi. Mamlakat ichida AQSH-Isroil operatsiyasini qo‘llab-quvvatlashga nisbatan turlicha qarashlar mavjud.

Ukraina masalasi ham muhokama qilindi

Uchrashuvda Rossiyaning Ukrainadagi urushi alohida e’tibor markazida bo‘ldi. Mers Ukrainani doimiy qo‘llab-quvvatlash zarurligini ta’kidladi va Kiyev hududiy yon berishga majbur bo‘lmasligi kerakligini bildirdi.

“Bu urush imkon qadar tezroq tugashi kerak. Ammo Ukraina o‘z hududini va xavfsizlik manfaatlarini saqlab qolishi shart”, degan kansler.

Tramp esa Rossiya va Ukraina o‘rtasidagi urushni tugatish ustuvor vazifalardan biri bo‘lib qolayotganini aytgan. U AQSHda yetarli miqdorda o‘q-dorilar mavjudligini va zarurat bo‘lsa, Yevropaga yetkazib berilishi mumkinligini qo‘shimcha qilgan.

Savdo va Ispaniya bilan bog‘liq keskin bayonot

Muzokaralar davomida savdo masalalari ham ko‘tarildi. Tramp Ispaniya AQSH kuchlariga o‘z bazalaridan foydalanishga ruxsat bermaganini tanqid qilib, savdo aloqalarini to‘xtatish bilan tahdid qildi. Mers yopiq eshiklar ortidagi suhbatda Trampga Ispaniya Yevropa Ittifoqi a’zosi ekanini va savdo masalalari alohida davlat bilan emas, balki YeI bilan kelishilishi kerakligini aytgan.

Yevropada xavfsizlik masalalari

Mers Vashingtonga jo‘nab ketishidan avval Germaniya va Fransiya yadroviy himoya bo‘yicha hamkorlikni chuqurlashtirish rejasini e’lon qilgan edi. Bu Yevropaning Rossiya tahdidi va Yaqin Sharqdagi beqarorlik fonida o‘z xavfsizlik siyosatini qayta ko‘rib chiqayotganidan darak beradi. Shuningdek, ikki yetakchi Xitoy masalasini ham muhokama qilgan. Mers yaqinda Pekinga tashrif buyurgan, Tramp esa oy oxirida Xitoyga borishni rejalashtirmoqda.

Tahlilchilar fikri

Ekspertlarning fikricha, uchrashuv davomida muhim masalalar muhokama qilingan bo‘lsa-da, Eron bo‘yicha aniq strategiya va yakuniy rejalar ochiq e’lon qilinmagan. Germaniya tomoni harbiy harakatlarning xalqaro-huquqiy asoslari va uzoq muddatli oqibatlari yuzasidan xavotir bildirmoqda. Oq uydagi uchrashuv AQSH va Germaniya o‘rtasidagi hamkorlik davom etayotganini ko‘rsatsa-da, Eron, Ukraina va savdo masalalarida murakkab diplomatik jarayonlar hali oldinda ekanini namoyon etadi.