Трамп Канадага таҳдид қилди

АҚШ Президенти Дональд Трамп АҚШ ва Канадани боғловчи янги автомобиль кўприги очилишини АҚШ берган барча ёрдамлар (хавфсизлик ва мудофаа, савдо имтиёзалари, энергетика ва логистика қулайликлари, сиёсий босим қилмаслик) учун “тўлиқ компенсация” олмагунча тўсиб қўйиш билан таҳдид қилди. Бу ҳақда Трамп ўзининг Truth Social тармоғидаги постида маълум қилди.

Канадалик машҳур хоккейчи номи билан аталган Горди Хоу халқаро кўприги Канаданинг Онтарио провинцияси билан АҚШнинг Мичиган штатини боғлайди. 

“АҚШ Канадага берган барча нарсалар учун тўлиқ компенсация олмагунча ва энг муҳими, Канада АҚШга биз муносиб бўлган адолат ва ҳурмат билан қарай бошламагунча мен бу кўприк очилишига рухсат бермайман”, деб ёзган Трамп. 

Шунингдек, у постида Трамп АҚШ ушбу “активнинг камида ярмига эгалик қилиши керак”лигини ҳамда “музокаралар дарҳол бошланишини” айтган, бироқ тафсилотларни очиқламаган. 

Лойиҳа расмий сайтида келтирилишича, кўприк Канада ҳукумати томонидан молиялаштирилган, бироқ у Канада ва Мичиган штатининг қўшма давлат мулки ҳисобланади.

Тўлиқ Канада ҳукуматига тегишли бўлган кўприк Детройт дарёси устидан ўтади ва 2026 йил бошида расмий синов ва тасдиқлаш жараёнларидан сўнг очилиши кутилаётган эди. Қурилиш 2018 йилда бошланган, бироқ лойиҳа 10 йилдан ортиқ вақт давомида икки давлат ўртасида баҳс-мунозараларга сабаб бўлиб келган. Кўприк қурилиши 6,4 миллиард Канада доллари (4,7 миллиард АҚШ доллари)га тушган.

“Кўприкнинг Канада ва АҚШдаги томони ҳам Канадага тегишли. Албатта, улар кўприкни деярли Америка материалларидан фойдаланмасдан қуришди. Энди Канада ҳукумати менга шунчаки “Америкадан фойдаланиш”га рухсат беришимни кутяпти! АҚШ нимани олмоқда? Мутлақо ҳеч нарсани!” деб ёзган Трамп.

АҚШ ва Канадани боғловчи қўшни кўприк эгалари бўлган Морун оиласи Трампнинг биринчи президентлик муддати пайтида ундан янги кўприк қурилишини тўхтатишни сўраган эди. Уларнинг таъкидлашича, бу лойиҳа уларга берилган пуллик йўл йиғими олиш бўйича эксклюзив ҳуқуқларни бузган. Бунга жавобан Трамп ва ўша пайтдаги Канада Бош вазири Жастин Трюдо қўшма баёнот эълон қилиб, янги кўприк икки мамлакат ўртасидаги “ҳаётий муҳим иқтисодий боғловчи” эканини билдирган эди.

Эслатиб ўтамиз, аввалроқ Канада Бош вазири Канада ва АҚШ ўртасидаги аввалги муносабатлар даври якунланганини, Канадани оғир давр кутаётганини айтган эди. У, шунингдек, Канада ўз иқтисодиётини тубдан қайта кўриб чиқиши, АҚШга қарамликни камайтириши ва халқаро савдо муносабатларини ўзгартириши кераклигини таъкидлаган эди.

Эъзоза Олимова