Трамп Мерцни АҚШнинг ишларига “камроқ аралашишга” чақирди

АҚШ Президенти Дональд Трамп Германия канцлери Фридрих Мерцни Қўшма Штатлар ишларига “камроқ аралашишга” ва ўз мамлакати билан шуғулланишга чақирди. Бу ҳақда у ўзининг Truth Social ижтимоий тармоғидаги саҳифасида ёзди.

“Германия канцлери Россия ва Украина ўртасидаги урушни тугатишга (бу масалада у бутунлай самарасизлигини кўрсатди) ҳамда ўз мамлакатининг вайрон бўлган тизимини, айниқса иммиграция ва энергетика масалаларини тузатишга кўпроқ вақт ажратиши керак. Шунингдек, Эрон томонидан келаётган ядровий таҳдидни бартараф этиш орқали дунёни, жумладан Германияни ҳам хавфсизроқ қилаётганларнинг ишларига камроқ аралашиши лозим”, деб ёзди Дональд Трамп.

Маълумот учун, аввалроқ Фридрих Мерц АҚШнинг Эронга қарши урушда стратегияси, жумладан, бу уруш қандай якунланиши кераклиги борасида режаси йўқлигини маълум қилган.

“Ҳозирги вақтда америкаликлар қандай стратегик йўлни танлашларини тушунмаяпман, айниқса, эронликлар музокараларни жуда усталик билан олиб бораётган – тўғрироғи, музокара олиб бормасликни жуда моҳирлик билан уддалаётган бир пайтда”, дейди у Германия ғарбидаги Марсберг шаҳридаги гимназия ўқувчилари билан учрашувда.

АҚШ Президенти Дональд Трамп ушбу фикрларга кескин муносабат билдирди.

Эслатиб ўтамиз, аввалроқ Фридрих Мерц немислар сўнгги 20 йилда фаровонлик муҳитига жуда ўрганиб қолганини, бироқ аввалгидек яхши яшаш даври тугаганини айтган эди.