Трамп режаси: Киев ҳудудларни беришдан бош тортди

Киев АҚШ Президенти Дональд Трампнинг тинчлик режасини муҳокама қилишга тайёр, аммо Украина ҳудудий суверенитети савдо предметига айланмайди. Бу ҳақда 20 ноябрь куни Нью-Йоркда бўлиб ўтган БМТ Хавфсизлик Кенгаши брифингида Украинанинг БМТдаги доимий вакили ўринбосари Кристина Гайовишин маълум қилди.

Гайовишиннинг таъкидлашича, Киев АҚШ томонидан Трамп маъмурияти ишлаб чиққан тинчлик режаси лойиҳасини расман олган. 

“Биз урушни адолатли тугатишни таъминлаш йўлида ушбу режа устидан ишлашга тайёрмиз”, деди у.

Трамп режасига жавобда Киевнинг “қизил чизиқлари”

Дипломатнинг айтишича, Киев конструктив музокараларга, лидерлар даражасидаги мулоқотга ҳам тайёр, аммо бир қатор “қизил чизиқлар” бор:

• Украина вақтинчалик оккупация қилинган ҳудудларни Россияники сифатида тан олмайди.

“Бизнинг еримиз сотилмайди”, деди Гайовишин.

• Киев ўзини ҳимоя қилиш имкониятларини чекламайди, шу жумладан, Қуролли Кучлар сони ва қудрати бўйича ҳеч қандай чекловларга рози бўлмайди.
• Украина қайси иттифоқларга қўшилиш масаласида ҳам чекловларга йўл қўймайди.
• Украина “террор ва геноцид” деб баҳоланаётган Россия тажовузига қарши курашни давом эттиради. Бу тажовуз украин тили ва миллий ўзига хослигига зарба бермоқда, дея қўшимча қилди у.
• Киев ҳали ҳам “Украина ҳақида – Украинанинг ўзи иштирокисиз, Европа ҳақида – Европасиз ҳеч нарса ҳал қилинмайди” принципида қатъий турибди.

“Росия иқтисодий, сиёсий ва ҳарбий жиҳатдан ортга чекинишга мажбур қилиниши лозим”, деди Украина вакили.

“Axios”: Уиткофф Умаров билан режани муҳокама қилган

Америка портали “Axios”нинг ёзишича, АҚШ президентининг махсус вакили Стивен Уиткофф Трампнинг 28 банддан иборат режасини ишлаб чиққан гуруҳ раҳбари – 15–16 ноябрь кунлари Украина Миллий хавфсизлик ва мудофаа кенгаши котиби Рустам Умаров билан таклиф қилинган кафолатларни муҳокама қилган. Лойиҳа 20 ноябрь куни Президент Владимир Зеленскийга ёзма равишда топширилган.

Умаровнинг ўзи 21 ноябрь куни билдиришича, у АҚШ режасига баҳо бермаган, унинг иштироки “техник характерга эга” бўлган.

Россия Президенти матбуот котиби Дмитрий Песков эса шу куни Москвага Зеленскийнинг тинчлик режаси бўйича музокараларга рози бўлгани ҳақида ахборот берилмаганини билдирди.