Трамп Россиядан ҳам, Украинадан ҳам ғазабланди – Оқ уй

АҚШ Президенти Дональд Трамп Россиянинг ишларидан ҳам, Украинанинг ҳаракатидан ҳам жуда норози. Бу ҳақда Оқ уй матбуот котиби Кэролайн Ливитт кеча, 11 декабрь куни журналистлар билан ўтказган суҳбатда айтиб ўтди.

Ливиттга кўра, Трамп амалий чоралар кўрилмаётганидан жуда хафа ва у энди шунчаки суҳбатлар эмас, балки аниқ ҳаракатларни истаяпти.

“Учрашувлар фақат натижасиз бўлгани учун у чарчаган. Трамп энди суҳбат эмас, ҳаракат истайди, бу урушнинг тугашини хоҳлайди. Сўнгги бир неча ҳафта ичида АҚШ маъмурияти россияликлар, украиналиклар ва европаликлар билан учрашув ва суҳбатлар учун 30 соатдан ортиқ вақт сарфлади”, деган Оқ уй сўзловчиси. 

Матбуот котиби, шунингдек, АҚШ ҳукумати уришаётган икки томон билан ҳам мулоқотни давом эттиришини таъкидлаган. 

АҚШнинг Германия, Буюк Британия, Франция ва Украина вакиллари иштирок этадиган, 13 декабрь куни Парижда бўлиб ўтиши режалаштирилган учрашувда қатнашиши масаласида Ливитт аниқ жавоб бермаган. 

“Агар тинчлик келишуви имзоланиши учун ҳақиқий имконият пайдо бўлса, агар биз ушбу учрашувлар АҚШ бу ҳафта охирида сарфлайдиган вақтга арзишини ҳис қилсак, унда биз вакил юборамиз”, деган Ливитт. 

Эслатиб ўтамиз, аввалроқ Дональд Трампнинг маъмурияти сўнгги ҳафталарда европалик амалдорлар билан Украина бўйича тинчлик режасига қўшимча ҳужжатларни қўшишни муҳокама қилаётгани ҳақида хабар берилганди. Уларда ЕИ ҳудудида музлатилган Россия активларини ечиш ва уларни АҚШнинг молиявий ва бошқа компанияларига Украинада лойиҳаларни ривожлантириш учун топшириш таклиф қилинган.