Трамп TikTok’нинг АҚШдаги “умри”ни 75 кунга узайтирди

АҚШ Президенти Дональд Трамп TikTok’нинг мамлакатдаги фаолиятини яна 75 кунга узайтирувчи фармонни имзолади. Бу ҳақда у ўзининг Truth Social ижтимоий тармоғида маълум қилди. 

“Менинг администрациям TikTok'ни сақлаб қолиш бўйича битим устида жуда жиддий ишламоқда ва биз катта ютуқларга эришдик. Битим яна бироз ишлашни талаб қилади. Умид қиламизки, Хитой билан ҳалол ҳамкорликда ишлашда давом этамиз. Менимча, улар ўзаро бож ставкаларимиздан унчалик мамнун эмаслар. Биз TikTok'нинг “соя остида” қолишини истамаймиз. TikTok ва Хитой Халқ Республикаси билан ҳамкорликда битимга эришишга умид қиламиз", деб ёзди Дональд Трамп.

Маълумот учун, давлат раҳбари лавозимига киришганидан сўнг у TikTok’нинг эгаси бўлган Хитой компанияси ByteDance га 5 апрелгача TikTok'нинг АҚШдаги бизнес қисмини Америка компанияга сотишни мажбурий қилган эди. Трампнинг таъкидлашича, битимнинг барча ҳуқуқий жиҳатларини расмийлаштириш учун қўшимча вақт зарур бўлиб, айнан шу сабабли у TikTok’нинг мамлакатдаги фаолиятини яна 75 кунга узайтирувчи фармонни имзолаган.

Эслатиб ўтамиз, аввалроқ Дональд Трамп томонидан жорий этилган божлар туфайли TikTok ижтимоий тармоғининг АҚШдаги активларини сотиш бўйича битим бекор қилинганди. Битим TikTok’га эгалик қилувчи Хитой интернет холдинги – ByteDance ва АҚШ ҳукумати томонидан маъқулланган эди. Манбалар берган маълумотларга кўра, битим ижтимоий тармоқнинг операциялари АҚШда жойлашган ва асосан америкалик инвесторларга тегишли янги компанияга ўтишини назарда тутган.