Трамп Украина учун Patriot'ни қайси давлат етказиб беришини айтди

АҚШ Президенти Дональд Трамп Patriot ҳаво мудофаа тизимлари учун мўлжалланган ракеталар Украинага етказиб берилиши аллақачон бошланганини эълон қилди. Бу ҳақда у кеча, 15 июль куни Вашингтондан Пенсильванияга учиш олдидан Эндрюс ҳарбий авиабазасида журналистлар билан бўлиб ўтган суҳбатда сўз очди.

“Улар аллақачон жўнатилган. Улар Германиядан юборилмоқда, Германия эса ўз захирасини кейин тўлдиради. Ҳар қандай ҳолатда ҳам АҚШ тўловни олади”, деган Трамп

Трамп кеча, 15 июль Patriot тизимлари учун ракеталар “бир неча кун ичида” Украинага етиб бориши ҳамда уларнинг сони 17 та эканлиги ҳақида айтганди. 

Жорий йилнинг 14 июль куни Трамп Оқ уйда НАТО Бош котиби Марк Рютте билан учрашувда Россия ва Украина ўртасида 50 кун ичида сулҳ бўлмаса, Россия ва унинг ҳамкорларига қарши 100 фоизлик бож тўловлари кўринишидаги санкциялар жорий қилиш билан таҳдид қилганди. Шунингдек, Трамп Европа давлатлари Украинага янги қурол етказиб бериш харажатларини қоплаши ҳамда қуроллар Европадан ўтиб, Киевга боришини айтганди.

Россия Президенти матбуот котиби Дмитрий Песков АҚШ Президенти Дональд Трампнинг Россиядан олиб кириладиган товарларга 100 фоизлик бож жорий қилиш ҳақидаги таҳдидини “жиддий” деб баҳолаганди. Песковнинг таъкидлашича, бу баёнотлар Кремль томонидан таҳлил қилинмоқда. Шунингдек, у Россия Президенти Владимир Путин бу борада шахсан изоҳ бериши мумкинлиги, аммо ҳозирча унинг позициясини кутиш лозимлигини урғулаган.