Трамп Украинада нима бўлаётганини тўлиқ англаб турибди – Рютте

НАТО Бош котиби Марк Рютте АҚШ Президети Дональд Трамп Украинадаги вазиятни тўлиқ англаб турганини айтди. Бу ҳақда у кеча, 11 февраль куни Брюсселда бўлиб ўтган матбуот анжуманида сўз очди.

“АҚШ Президенти Дональд Трамп Украинадаги “даҳшатли вазият”ни “тўлиқ англаб турибди”, дейди у.

Шунингдек, Рютте анжуманда Украинага сафари пайтида кўрганларини Трамп билан муҳокама қилганми ва қандайдир фикр-мулоҳаза олганми, деган саволга ҳам икки марта “ҳа” деб жавоб қайтарган. Аммо у Трамп билан нималар ҳақида гаплашганини “ҳеч қачон ошкор қилмаслиги”ни билдирган. 

Бош котибнинг айтишича, АҚШда Украинада нима бўлаётгани ҳақида “мутлақ аниқлик” бор, Рютте ва Трамп мунтазам суҳбатларида улар “нима бўлаётгани” ва “нима кўраётгани” ҳақида ахборот алмашиб туради. 

“Бу бизнинг доимий мулоқотларимизнинг бир қисми”, деб қўшимча қилган у.

Шу билан бирга, Рютте Украина сафари якунлари бўйича Трампга айнан нима деганини ва АҚШ Президентининг реакцияси қандай бўлганини аниқ айтмаган. Бундан ташқари, у бу муҳокамалар Вашингтоннинг Украинага келгусидаги қўллаб-қувватлаш масаласидаги позициясига таъсир қилган-қилмагани ҳақида ҳам маълумот бермаган.

Брюссельдаги брифингда алянснинг юқори лавозимли вакили Украина энергетикасидаги вазиятни ўта хавотирли деб атаган ва Россия ҳарбий жиҳатдан “кам аҳамиятга эга ёки умуман аҳамиятга эга бўлмаган” фуқаролик энергетика объектларига зарбалар беришда давом этаётганини қайд этган.

НАТОнинг юқори лавозимли амалдорлари баҳоси бўйича, жорий йил қишда Россия Украина шаҳарлари ва муҳим инфратузилмага ҳужумларни сезиларли даражада кучайтирган. Умуман олганда, 2025 йилда Россия тахминан 55 мингта ҳужумкор дронни учирган. Бу 2024 йилга нисбатан тахминан 5 баравар кўп.

Қолаверса, НАТОнинг бошқа бир юқори лавозимли амалдори “Россия ҳужумининг сусайиши кузатилмаяпти”, деб билдирган ва баллистик ҳамда қанотли ракеталар, шунингдек узоқ масофали дронлар қўлланган ҳаво ҳужумлари кучайганини айтган. Бу ҳужумлар аҳолини электр ва иссиқликдан маҳрум қилиш, шунингдек, транспорт ва тураржой ҳудудларига зарба беришга қаратилган. НАТО маълумотларига кўра, 2025 йил давомида фронторти ҳудудларга ракеталар ва дронлар билан қилинган ҳужумлар сони икки баравардан кўп ошган.

Эслатиб ўтамиз, аввалроқ Трамп дунёда учта ядровий урушнинг, жумладан, Россия ва Украина ўртасидаги эҳтимолий ядровий можаронинг олдини олганини маълум қилган эди.

Эъзоза Олимова