Трамп Венесуэлани “ўзиники” қилишини айтди

АҚШ Президенти Дональд Трамп мамлакати Венесуэлани “анча узоқ вақт” назорат қилишини айтди. Трампнинг сўзларига кўра, Рубио Венесуэланинг вақтинчалик раҳбари билан доимий алоқада. Бу ҳақда у кеча, 7 январь куни “The New York Times” газетасига берган интервьюсида сўз очди.

Қайд этилишича, Қўшма Штатлар Венесуэлани узоқ йиллар давомида бошқариши ва унинг нефть даромадларини назорат қилиши мумкин. Трампнинг сўзларига кўра, Қўшма Штатлар Венесуэлани қанча вақт назорат қилишини “фақат вақт кўрсатади”. 

“Биз уни жуда фойдали тарзда қайта тиклаймиз. Биз нефтдан фойдаланамиз ва нефть оламиз. Биз нефть нархларини пасайтирамиз ва Венесуэлага жуда муҳтож бўлганда пул берамиз”, дейди у. 

Трампнинг қўшимча қилишича, АҚШ Венесуэланинг вақтинчалик президенти Делси Родригес ҳукумати билан жуда яхши чиқишмоқда.

Эслатиб ўтамиз, аввалроқ Трамп Колумбия Президентини Оқ уйга таклиф қилгани ҳақида хабар берилганди. Трамп АҚШ блокадаси остида Венесуэлада қолиб кетган 50 миллион баррелгача Венесуэла нефтини қайта ишлаш ва сотиш режасини эълон қилган. Шунингдек, Трамп Колумбия президенти билан алоқаларни яхшилагани ҳақида ҳам айтиб ўтган. У ижтимоий тармоқлардаги постида мавқедоши Петро билан бўлиб ўтган биринчи қўнғироқни самимий деб таърифлаган. https://qalampir.uz/news/tramp-kolumbiya-prezidentini-ok-uyga-taklif-k-ildi-129866