Трампнинг “олтин виза” дастурига атиги 338 та ариза топширилди

АҚШ Президенти маъмурияти жорий йил апрель ойи охирида Дональд Трамп ташаббуси билан 2025 йил декабрида ишга туширилган “олтин виза” (нархи 1 миллион доллардан бошланади) дастури бўйича аризалар ҳақидаги маълумотларни очиқлади. Бу ҳақда “The Washington Post” хабар берди.

Апрель ойи охирига келиб, “олтин виза” олиш учун жами 338 та ариза келиб тушган. Ушбу аризачиларнинг фақат 165 нафари қайтариб берилмайдиган 15 минг долларлик рўйхатдан ўтиш йиғимини тўлаган ва атиги 59 киши кейинги босқичга – АҚШ Ички хавфсизлик вазирлигида ҳужжатларни тўлдириш жараёнига ўтган.

“The Washington Post” нашрининг ёзишича, иммиграция бўйича юристлар ўз мижозларини “олтин виза” дастурида иштирок этишдан қайтармоқда. Сабаби, ушбу дастур Конгресс томонидан маъқулланмаган ва исталган вақтда Президент фармони билан бекор қилиниши мумкин. Бундан ташқари, дастур суд жараёнлари хавфи остида қолган ва хорижий инвесторлар учун мавжуд бошқа иммиграция дастурларига қараганда ҳеч қандай солиқ имтиёзларини тақдим этмайди.

“Олтин виза” дастури билан ишлашни истамаётган юристлар орасида “The Washington Post” АҚШнинг биринчи хоними Мелания Трамп ва унинг ота-онасига АҚШ фуқаролигини олишда ёрдам берган Майкл Уайлдсни ҳам тилга олган.

Эслатиб ўтамиз, аввалроқ АҚШ Давлат департаменти вақтинчалик виза олиш учун ариза топширувчиларни текширишнинг янги тартибини жорий этгани ҳақида хабар берилган эди.