Трампнинг янги тарифлари кучга кирди

north_east

Трамп ЕИ билан савдо битими тузилганини эълон қилди

АҚШнинг Европа Иттифоқи ва бошқа савдо шерикларига нисбатан қўшимча импорт тарифлари кучга кирди. Бу ҳақда АҚШ Президенти Дональд Трамп бугун, 7 августга ўтар кечаси Truth Social ижтимоий тармоғида бош ҳарфлар билан ёзди.

"Ярим тун бўлди! Тарифлардаги миллиардлаб долларлар энди АҚШга тушади, асосан АҚШни йиллар давомида эксплуатация қилиб, кулиб келган давлатлардан", деб ёзди Трамп.

Аслида янги божлар  1 августдан кучга кириши керак эди. Бироқ Оқ уй 31 июль куни АҚШ Президенти бир қатор давлатларга нисбатан янги божхона тўловларини жорий этиш тўғрисидаги фармон чиқаргани ва унга кўра, янги тарифлар 7 августдан кучга киришини маълум қилди. Америкалик расмийлар бунга сабаб сифатида янги қоидаларни амалга ошириш учун кўпроқ вақт кераклигини келтирди. Оқ уй ҳужжатига кўра, бу чора “америкалик ишчилар манфаатларидан келиб чиққан ҳолда глобал савдони қайта қуриш”га қаратилган.

Баъзи энг юқори тарифлар Швейцария (39%), Сурия (41%), Лаос ва Мьянма (40%), шунингдек, Ироқ (35%), Қозоғистон (25%) ва Ҳиндистон (25%) учун белгиланган. Европа Иттифоқи, Япония ва Жанубий Корея учун 15% қўшимча тўлов кўзда тутилган. Рўйхатда бўлмаган мамлакатларга 10% лик ягона тариф қўлланилади.

Трамп Ҳиндистон Россиядан ҳарбий техника ва энергия манбаларини харид қилгани учун ҳам “жазоланиши” кераклигини айтди. У Ҳиндистон нафақат катта миқдорда Россия нефтини сотиб олаётгани, балки бу нефтни очиқ бозорда қайта сотиб, катта фойда олаётганини таъкидлади. 

Ҳиндистон Ташқи ишлар вазирлиги бу танқидларни асоссиз деб атади. 

“Ҳиндистон Россиядан нефть сотиб олишга мажбур. Бизни танқид қилаётган мамлакатларнинг ўзлари ҳам Россия билан савдони давом эттирмоқда. Бироқ уларнинг бундай ҳаракатлари ҳаётий миллий заруратдан келиб чиқмайди”, дейилади Ҳиндистон томонининг жавобида.

Ҳиндистон вакилларининг тушунтиришича, Украина уруши бошланганидан кейин анъанавий нефть етказиб берувчилар Европага йўналган, АҚШ эса ўзи ҳам Ҳиндистонга Россия нефтини сотиб олишни маъқуллаган, бу глобал энергия бозоридаги барқарорлик учун керак бўлган.

Шунингдек, 5 август куни Трамп Европа Иттифоқи келишув бўйича сармоявий мажбуриятларини бажаришдан бош тортса, унга 35 фоизлик божлар жорий этиш билан таҳдид қилган эди. Шу билан бирга, Трамп Европа Иттифоқининг АҚШ иқтисодиётига сармоя киритиши ҳақидаги келишувни “совға” деб атади.

"Ва бу совға, бу қарз эмас. Улар бизга 600 миллиард доллар беришди, биз хоҳлаган нарсага сармоя киритишимиз мумкин", деди Трамп.

DPA агентлигининг ёзишича, Трампнинг бу баёнотлари ЕИнинг келишув талқинига зид. Европа Комиссияси веб-сайтида айтилишича, ЕИ АҚШдан энергия ресурсларини 750 миллиард долларга сотиб олмоқчи ва “Европа Иттифоқи компаниялари 2029 йилгача АҚШ иқтисодиётининг турли тармоқларига камида 600 миллиард доллар сармоя киритишга қизиқиш билдирган”.

Оқ уй келишувнинг ушбу бандини ЕИнинг мажбурияти, Брюссель эса компанияларнинг нияти сифатида изоҳламоқда.