Царукян Путин Ҳабиб учун спортзал қуриб берганини айтди

UFC енгил вазн тоифаси (-70 кг) рейтингида иккинчи ўринда турувчи, Арманистон ва Россия вакили Арман Царукян Россия Президенти Владимир Путин UFC Шон-шараф зали аъзоси Ҳабиб Нурмагомедовга Силди қишлоғида спорт базаси қуришда ёрдам берганини айтди. Бу ҳақда у PBD Podcast YouTube каналига берган интервьюсида сўз очди.

“Ҳабибга спорт зали қуриш учун маблағ беришди. Путин у учун бу зални қуриб берди. Агар сиз россиялик жангчи ёки курашчи бўлсангиз, сиздан хабар олишади, чунки сиз ўз мамлакатингиз учун нимадир қилган бўласиз”, дейди Царукян.

Маълумот учун, Арман Царукян 29 ёшда. Асли ахалкалакилик бўлган бу жангчининг ММАдаги профессионал рекорди 23 та ғалаба (шундан 15 таси муддатидан олдин) ва 3 та мағлубиятдан иборат. У профессионал яккакурашлардаги дебютини 2015 йил сентябрь ойида қилган, UFC билан эса 2019 йил апрелдан ҳамкорликни бошлаган. У эркин кураш ва ММА бўйича спорт устаси ҳисобланади.