Туркияда Нетаньяху ҳукуматига 4596 йилгача қамоқ талаб қилинди

Туркияда прокурорлар геноцид ва бошқа жиноятларда айбланаётган, сиртдан ҳибсга олинган Исроил Бош вазири Биньямин Нетаньяху учун умрбод қамоқ жазосини талаб қилди. Бу ҳақда “Hürriyet” газетаси хабар берди.

Аниқлик киритилишича, прокуратура Истанбул судига айблов хулосасини юбориб, унда умрбод қамоқ жазоси ҳамда “35 нафар айбланувчи учун 1102 йилдан 4596 йилгача бўлган қамоқ муддатларини” талаб қилган. Айбланувчилар орасида Нетаньяху, Исроил Мудофаа вазири Исраэль Кац ва яна бир неча вазирлар бор.

Журналистларнинг қайд этишича, уларнинг барчаси Ғазо секторида инсониятга қарши жиноятлар, геноцид, озодликдан маҳрум қилиш, шафқатсиз муомала, зарар етказиш ва бошқа жиноятларда айбланмоқда.

Эслатиб ўтамиз, ўтган йилнинг ноябрь ойида Истанбул бош прокуратураси Нетаньяху ва Исроилнинг 36 нафар юқори мартабали мулозимини Ғазо секторидаги геноцид ва инсониятга қарши жиноятлар айблови билан ҳибсга олишга ордер берилганини эълон қилган эди. Истанбул адвокатлар ҳайъати раиси Ясин Шамли ариза топширилгандан сўнг Тель-Авивни ўт очишни тўхтатиш бўйича халқаро келишувларни бузишда айблаган ва “Исроилнинг террорчилик тузилмаси” бутун инсоният учун хавфга айланганини таъкидлаган.