Туркияда сув таъминоти билан боғлиқ вазият кескинлашмоқда – ОАВ

Туркияда сув таъминоти билан боғлиқ вазият кескинлашмоқда. Анқарани сув билан таъминлайдиган сув омборларида сув сатҳи жиддий даражада пасайган. Бу ҳақда Сув таъминоти ва канализация бошқармаси (ASKİ) маълумотларига таяниб, “Ekonomim” хабар берди.

Нашр маълумотига кўра, бугун, 22 январь ҳолатига сув омборларининг умумий тўлдирилиш даражаси атиги 12,6 фоизни ташкил этган. Фаол фойдаланиш мумкин бўлган сув ҳажми эса 1,38 фоизгача камайган.

Қайд этилишича, Анқарани сув билан таъминлайдиган сув омборларининг ҳозирги ҳолати ўта хавотирли ҳисобланади ва вазият жиддий назорат остига олинган.

Шунингдек, Туркия Президенти Ражаб Тойиб Эрдўған мамлакатнинг йирик шаҳарларида – Анқара, Бурса ва Истанбулда сув танқислиги юзага келиши мумкинлиги ҳақида огоҳлантирган. Президент бу ҳолатни қуруқ об-ҳаво шароитида мухолифат бошқарувидаги муниципалитетларнинг етарли чоралар кўрмагани билан изоҳлаган.

Шунингдек, у маҳаллий ҳокимиятларнинг сусткашлиги сув таъминоти билан боғлиқ муаммоларни янада чуқурлаштирганини таъкидлаган.

Эслатиб ўтамиз, аввалроқ БМТ ҳузуридаги Сув, атроф-муҳит ва соғлиқни сақлаш университети дунё бўйлаб сув ресурслари кескин қисқариб бораётгани ҳақида хабар берган эди.