“У ёлғон гапиряпти”. Трамп Путиндан норози эканини айтди

АҚШ Президенти Дональд Трамп Россия Президенти Владимир Путиндан кескин норози эканини билдириб, Кремль раҳбари Вашингтоннинг барча саъй-ҳаракатларига қарамай, Украинадаги жанговар ҳаракатларни тўхтатишни истамаётганини айтди. Бу ҳақда у кеча, 8 июль куни ҳукумат йиғилиши чоғида сўз очди. 

“Бу уруш бўлмаслиги керак эди. Жуда кўп одамлар ўляпти, бу эса тугаши лозим”, дейди Трамп.

У, шунингдек, Путиннинг ташқи мулойимлиги бефойда эканини айтган ва “Россияга қарши янги санкциялар жорий этилиши мумкинми?”, деган саволга “Мен буни кўриб чиқяпман”, дея жавоб берган.

Шу билан бирга, Вакиллар палатасининг собиқ спикери Ньют Гингрич Х ижтимоий тармоғида сенатори-републикачи Линдси Грэм томонидан тайёрланган “эзувчи” санкциялар тўғрисидаги қонун лойиҳаси бугун, 9 июль куни Конгрессга тақдим этилишини билдирган.

“Бу жуда муҳим ҳужжат. У Путинга шуни кўрсатадики, қотилликлар – бу мағлубиятга олиб борадиган стратегия. Америкаликлар қатлиомлар ва ёлғонларга фақат маълум муддатгача чидайди,” деб ёзди Гингрич.

Унинг айтишича, Грэмнинг ташаббуси Украинадаги ўт очишни тўхтатиш сари “ақлли навбатдаги қадам”.

Грэмнинг ўзи ҳам аввалроқ янги қонун лойиҳаси Трампга Россия маҳсулотларини, хусусан, нефть-газ экспортини сотиб оладиган давлатларга нисбатан 500 фоизлик божлар жорий этиш ҳуқуқини беришини айтган.

“Урушга барҳам бериш учун Трамп қўлида бўлган босим воситаларини кучайтириш вақти келди”, дейди Грэм

Қонун лойиҳасини аллақачон 85 сенатор қўллаб-қувватлаган, бу рақам ортиб бормоқда.

Қайд этиш жоиз, Трамп Президентликка қайтганидан бери Владимир Путин билан бир неча бор телефон орқали мулоқот қилган. Ҳар сафар у “аъло даражадаги мулоқот” бўлгани ва Россия етакчиси гўёки тинчлик истаётгани ҳақида гапирган. Бироқ Москва Украина ҳудудларига ҳужумларни янада кучайтиргани туфайли Трамп бу борадаги реал вазиятни тан олишга мажбур бўлди.

Эслатиб ўтамиз, Дональд Трамп  россиялик мавқедоши Владимир Путин билан 3 июль куни бўлиб ўтган сўнгги телефон мулоқоти чоғида Россиянинг Украинадаги уруши сабабли АҚШ санкцияларини кучайтириши мумкинлиги ҳақида огоҳлантирганини ва Путин, унинг сўзларига кўра, бу истиқболдан хавотирда ва санкциялар жорий этилиши мумкинлигини тушунганини айтганди.