UFC Оқ уйдаги тадбир чипталарининг аксариятини ҳарбийларга бермоқчи

UFC бош директори Дана Уайт АҚШ Президенти Дональд Трамп билан ҳамкорликда Оқ уй ҳудудида ўтказиладиган турнир чипталарининг катта қисмини ҳарбий хизматчиларга хайрия қилишни режалаштирмоқда. Бу ҳақда “Fox News” хабар берди.

Бунгача Дональд Трамп АҚШнинг 250 йиллиги муносабати билан Оқ уй ҳудудида UFC турнири ўтказилишини эълон қилган эди. Ушбу тадбир АҚШ Мустақиллик Декларацияси имзоланишининг 250 йиллигига бағишланади. Турнир жорий йилнинг 14 июнь куни ўтказилиши режалаштирилган бўлиб, айнан шу куни Трамп 80 ёшни қарши олади.

Манбага кўра, тадбир учун 4300 томошабинга мўлжалланган вақтинчалик арена қурилади. Чипталарнинг катта қисми ҳарбийларга бепул тарқатилади. Бундан ташқари, ташкилотчилар яқин атрофдаги паркда жангларни томоша қилиш учун мухлисларга 85 мингта бепул чипта ажратишни режалаштирмоқда. Ушбу ҳудудда катта экранлар ва саҳналар ўрнатилади.

Турнирнинг асосий жангида UFC енгил вазн тоифаси чемпиони, испаниялик Илия Топурия ўз камарини америкалик Жастин Гетжига қарши ҳимоя қилади.