Украина дронлари Краснодардаги нефть заводига ҳужум қилди

Бугун, 29 ноябрга ўтар кечаси Украина дронлари Краснодар ўлкасидаги Афипский нефтни қайта ишлаш заводига ҳужум қилди. Бу ҳақда минтақанинг оператив штаби хабар берди.

Қайд этилишича, икки томондан зарба берилганидан кейин корхона ҳудудида тахминан 250 квадрат метр майдонда ёнғин чиққан. Ёнғин тезда ўчирилган, ходимлар эвакуация қилинган. Оператив штаб маълумотига кўра, зарба оқибатида айрим технологик ускуналар шикастланган, бироқ резервуарлар зарар кўрмаган. Афипский посёлкасида ҳам қишлоқ хўжалиги корхонасининг ёрдамчи хўжалиги ёниб кетган. Бунга уриб туширилган дрон парчалари сабаб бўлган.

Маълумот учун, Афипский нефтни қайта ишлаш заводи Россиянинг Украинага кенг кўламли босқинидан бери бир неча бор Украина дронлари ҳужумига учраган. Завод жорий йилнинг сентябрь ойи охирида, шунингдек 7 ва 28 август кунлари ҳужумга учраган ва бу ҳужумлардан сўнг корхонага қайта ишлашни бир қурилмада тўхтатишга тўғри келган. Завод мамлакатдаги энг йирик ўнта НҚИЗ қаторига кирмаса-да, у 2025 йилдаги реконструкциядан сўнг Россиянинг жанубидаги энг қудратлилардан бирига айланган. Завод йилига 9,1 миллион тонна нефтни қайта ишлаш қувватига эга. Майдонда иккита бирламчи қайта ишлаш қурилмаси ишлайди.

Россия Мудофаа вазирлиги маълумотига кўра, 29 ноябрга ўтар кечаси Украина дронлари мамлакатнинг ўн вилояти ва аннексия қилинган Қримни нишонга олган. Ҳарбий идора 103 та учувчисиз аппарат уриб туширилгани ва йўқ қилингани ҳақида хабар берган. Хусусан, 26 та дрон Белгород вилояти, 20 таси Ростов вилояти, 11 тадан Рязань вилояти ва Краснодар ўлкаси, 5 таси Воронеж, 4 таси Липецк, 3 таси Курск, биттадан Астрахан ва Волгоград вилоятлари ҳамда Қалмоғистон устида, 19 таси Қрим устида ва биттаси Азов денгизи акваторияси устида уриб туширилган.

Ростов вилояти губернатори Юрий Слюсарь ҳужумлар Таганрог, шунингдек Каменский, Миллеровский, Азовский ва Дубовский туманларига қаратилганини айтган. Таганрогда кўп қаватли уй шикастланган, қурилиш саноати ва технологиялари техникуми ётоқхонасининг томи вайрон бўлган, хусусий уй ёниб кетган. Слюсарнинг билдиришича, жабрланганлар йўқ. Губернатор Андрей Бочаровнинг маълумотига кўра, Волгоградда тўртта тураржой биноси ва қурилиш материаллари омбори зарар кўрган, икки киши жароҳат олган.

Эслатиб ўтамиз, аввалроқ Қора денгизнинг Туркия қирғоқларига яқин ҳудудда Россияга кетаётган Kairos нефть танкери минага тўқнашиб портлагани ҳақида хабар берилганди. Буюк Британия ва Европа Иттифоқи томонидан Россия нефтини ташиганлик учун санкция остига олинган ушбу кема портлаш ва ундан кейин юзага келган ёнғин оқибатида зарар кўрган.