“Ўрикзор” бозорида ҳайдовчилар жанжал кўтарди (видео)

Ижтимоий тармоқларда ҳайдовчи ва бир гуруҳ шахслар ўртасидаги жанжал акс этган видео тарқалиб, кенг муҳокамаларга сабаб бўлди. Кеча, 14 февраль куни Тошкент шаҳар Ички ишлар бош бошқармаси ҳолат бўйича изоҳ берди. 

Маълум қилинишича, ҳодиса Тошкент шаҳар Учтепа туманидаги “Ўрикзор” бозори ҳудудида, Юсуф Саккокий маҳалласида содир бўлган. Isuzu русумли машина ҳайдовчиси юк тушириб чиқаётган вақтида йўлнинг қатнов қисмида арава етаклаб кетаётган шахсга сигнал чалган. Ҳайдовчининг айтишича, у ҳам йўл беришни сўраган, оқибатда ўртада келишмовчилик келиб чиққан.

Шундан сўнг, арава етаклаган шахс телефон орқали яқинларини чақирган. Орадан кўп ўтмай бир неча киши келиб, жанжал кучайган. Можаро вақтида ҳайдовчи қўлига тушган монтировка билан урганини, кейин эса унга бир неча киши томонидан тош отилганини билдирган ва қилган ишидан пушаймон эканини айтиб, узр сўраган.

Арава етаклаган шахс ҳам ҳайдовчи билан тортишув бўлганини, кейин яқинларини чақиргани ва жанжал катталашиб кетганини тан олган. Бундан пушаймонлигини, қайта такрорланмаслигини билдирган.

Мазкур ҳолат юзасидан Учтепа тумани ички ишлар органлари томонидан Ўзбекистон Республикаси Жиноят кодексининг 277-моддаси (безорилик) билан жиноят иши қўзғатилган. Ҳозирда тергов ҳаракатлари олиб борилмоқда. Барча иштирокчиларнинг хатти-ҳаракатларига ҳуқуқий баҳо берилиши маълум қилинган.