Урушни тугатишда Европанинг АҚШдан умиди катта – Зеленский

Мюнхен хавфсизлик конференцияси бу йил Россия–Украина урушини тугатиш бўйича музокаралардаги муваффақиятсизликни янада яққол кўрсатиши мумкин. Бу ҳақда “Politico” нашри хабар берди.

Анжуманда Украина Президенти Владимир Зеленский, АҚШ Давлат котиби Марко Рубио, НАТО Бош котиби Марк Рютте, Франция Президенти Эммануэль Макрон ва Буюк Британия Бош вазири Кир Стармер каби етакчилар иштирок этади. Бироқ европалик расмийлар аниқ натижалардан кўра бирдамлик баёнотлари устун бўлишини тахмин қилмоқда. 

Манбага кўра, Вашингтон Киев ва Москва ўртасида урушни якунлаш бўйича умумий келишувга эришилмагунча, Украинага узоқ муддатли хавфсизлик кафолатларини расман тасдиқламайди. Россиянинг Донбасс ҳудуди устидан тўлиқ назорат талаб қилиши ва Украинанинг ўз қўл остидаги ерларни беришдан бош тортиши музокараларни қийинлаштирмоқда.

Келаси ҳафта АҚШ, Россия ва Украина вакилларининг кейинги учрашуви режалаштирилмоқда. Сўнгги музокараларда ўт очишни тўхтатиш ва эҳтимолий демилитаризация зонаси бўйича умумий тушунчага яқинлашилган бўлсада, ҳудудий масала ва Ғарб ҳарбий кучларининг Украинадаги иштироки ҳануз асосий келишмовчилик нуқтаси бўлиб қолмоқда.

Зеленский конференцияда Россияга босимни кучайтириш ва Европа билан ягона позицияни намойиш этишни режалаштирмоқда. Етакчи, шунингдек, ҳаво мудофааси тизимлари ва қўшимча қурол-яроғ етказиб бериш масаласини кўтариши, ҳамкорлар билан қўшма ишлаб чиқариш лойиҳаларини кенгайтиришни таклиф қилиши кутилмоқда.

Трамп давридаги дипломатик саъй-ҳаракатлар аниқ натижалар бергани маълум. Шунинг учун ҳам, Зеленскийнинг қайд этишича, Европа расмийлари Украинага муҳим хавфсизлик кафолатлари беришда АҚШнинг ўрни бўлак эканига қатъий ишонч билдирмоқда.

Европалик айрим расмийлар Россия тинчлик музокараларига жиддий ёндашмаётганини таъкидламоқда. Шу билан бирга, уруш чўзилгани сайин Россия иқтисодиётига босим ортмоқда. Баъзи кузатувчилар Киевнинг стратегияси вақт ва иқтисодий босим орқали Москванинг муросага келишига эришишдан иборат бўлиши мумкинлигини қайд этмоқда.

Эслатиб ўтамиз, аввалроқ Владимир Зеленскийнинг икки нафар маслаҳатчиси Киев Донецк вилоятининг шарқий қисмидаги айрим ҳудудлар назоратидан воз кечишга тайёрлигини билдирган эди.

Мусулмон Содиқ