Ўзбекистон Россия билан ўртоқлик учрашуви ўтказмайди

Ўзбекистон футбол ассоциацияси биринчи вице-президенти Равшан Эрматов Ўзбекистон миллий терма жамоаси 2026 йилги Жаҳон чемпионати олдидан Россия терма жамоасига қарши ўртоқлик учрашуви ўтказишни режалаштирмаётганини айтди. Бу ҳақда Эрматов РИА Новости агентлигига берган интервьюсида маълум қилди.  

Маълумки, Ўзбекистон терма жамоаси ўз тарихида илк бор Жаҳон чемпионати йўлланмасини қўлга киритган. Қўшма Штатлар, Канада ва Мексикада бўлиб ўтадиган мундиалда Фабио Каннаваро шогирдлари Португалия ва Колумбия терма жамоаларига қарши баҳс олиб боради. Гуруҳдаги учинчи рақиб эса Янги Каледония, Ямайка ва Конго Демократик Республикаси иштирок этадиган қитъалараро плей-оффнинг биринчи босқичи якунларига кўра аниқланади.

Жаҳон чемпионати олдидан Ўзбекистон миллий терма жамоаси жорий йилнинг март ойида FIFA Series доирасида иккита ўртоқлик учрашувида майдонга тушади. Апрель ойидаги халқаро танаффус учун эса ҳозирча аниқ режалар эълон қилинмаган.

Май ойида терма жамоа Ўзбекистон Суперлигасининг етакчи жамоаларига қарши бир қатор ўртоқлик учрашувларини ўтказади. Шундан сўнг июнь ойида Ўзбекистон миллий терма жамоаси Жаҳон чемпионати олдидан Канада терма жамоасига қарши ўртоқлик учрашувида майдонга тушиши режалаштирилган.

Маълумот учун, Ўзбекистон ва Россия терма жамоалари шу кунгача бир марта ўзаро тўқнаш келган. 2022 йил ноябрь ойида Тошкентда ўтказилган ўртоқлик учрашуви 0:0 ҳисобидаги дуранг билан якунланган.