Ўзбекистонда яширин жангларга қарши чоралар кучайтирилади

Сўнгги вақтларда жанговар, яъни аралаш спорт турлари бўйича ноқонуний жанглар яширин тарзда ташкил этилмоқда ва уларда ёшлар ҳам иштирок этмоқда. Шу билан бирга, бу каби ҳолатлар учун амалда аниқ жавобгарлик чоралари мавжуд эмас. Бу ҳақда кеча, 12 март куни Президент Шавкат Мирзиёев кибержиноятлар ва уюшган жиноятчиликка қарши курашиш ҳамда ахборот технологияларидан фойдаланиб содир этиладиган ҳуқуқбузарликларнинг олдини олиш самарадорлигини ошириш юзасидан таклифлар тақдимоти билан танишиш чоғида айтиб ўтилди. 

Тақдимотда уюшган жиноятчиликнинг содир этиш шакл ва услублари янгиланиб бораётгани кўрсатиб ўтилган. 

Уюшган гуруҳлар томонидан жамиятда юриш-туриш қоидаларини очиқчасига менсимасдан, ўзини қонундан устун қўйиб, безорилик жиноятларини содир этганлиги ёки безорилик жиноятининг оғир шаклларидан бири – ўқотар қуролни намойиш қилиб ёки уни қўллаб ҳамда такроран содир этганлиги, шунингдек, жамоат тартибини сақлаш вазифасини бажариб турган ҳокимият вакилига қаршилик кўрсатган ҳолда содир этилганлик учун жазо чоралари бугунги кунда етарли таъсир кучига эга эмаслиги таъкидланган.

Шунингдек, сўнгги вақтларда жанговар (аралаш) спорт турлари бўйича яширин равишда ноқонуний жанглар ташкил қилиниб, уларда ёшларнинг иштирок этаётгани кузатилмоқда. Бироқ бугунги кунда бунинг учун жавобгарлик чоралари мавжуд эмаслиги кўрсатиб ўтилган.

Шу боис, қонун ҳужжатларига мана шундай хавф-хатарларнинг олдини олиш, уларга қарши аёвсиз курашиш, бундай иллатни таг-томири билан йўқотишга қаратилган нормаларни киритиш вақти келгани таъкидланган.

Оғир ва ўта оғир турдаги жиноятларни содир этиш мақсадида жиноий уюшма ташкил этганлик, уни молиялаштирганлик, улар томонидан содир этилган жиноятларни яширишга ҳомийлик қилганлик, жанговар спорт турлари бўйича мусобақаларни ноқонуний ташкил этганлик ва ўтказганлик учун жиноий жавобгарликни белгиловчи, безорилик жинояти учун жазо чоралари кучайтиришни назарда тутувчи, шунингдек, қонунга зид равишда ташкил этилган жанговар спорт турлари бўйича мусобақаларда иштирок этганлик учун маъмурий жавобгарликни белгиловчи нормалар киритиш таклиф этилган.

Муҳокама қилинган йўналишлар бўйича ишлаб чиқилган ахборот технологияларидан фойдаланиб содир этиладиган ҳуқуқбузарликларга қарши курашиш ҳамда уюшган ва жамоат жойларидаги жиноятчиликка қарши курашишнинг жиноий-ҳуқуқий механизмларини янада кучайтиришга қаратилган қонун лойиҳалари тақдимот қилинган.

Президент таклифларни маъқуллаб, мутасаддиларга тегишли топшириқлар берган. 

Эслатиб ўтамиз, тақдимот давомида Ўзбекистонда кибержиноят ва молиявий пирамидалар учун жазо кучайтирилиши ҳақида ҳам сўз борганди.