Узоқ вақт ўтириб ишлаш ўлим хавфини оширади – тадқиқот

Иш жойида узоқ вақт давомида ўтириш барча сабаблар бўйича ўлим хавфи ва юрак-қон томир касалликларини оширади. Бу ҳақдаги тадқиқот “JAMA Network Open” журналида эълон қилинган.

Маълум қилинишича, ушбу тадқиқот Тайваннинг Тайбэй Тиббиёт университети олимлари томонидан ўтказилган. Тадқиқотчилар иш жараёнида ўтириш ва ҳаракатни алмашлаб ташкил этиш бу хавфни камайтириши мумкинлигини таъкидлаган.

Тадқиқотга юрак-қон томир касалликлари тарихига эга бўлмаган 481 688 нафар катталар жалб қилинган. Иштирокчилар 1996 йилдан 2017 йилгача, яъни тахминан 12 йил давомида кузатилган. Ҳар бир тадқиқот давомида иштирокчилар ўз касаллик тарихи ва турмуш тарзи бўйича анкетани тўлдирган ҳамда биокимёвий таҳлиллар учун биологик намуналар тақдим қилган.

Натижалар шуни кўрсатганки, тахминан 60 фоиз киши иш куни давомида асосан ўтирган, 10 фоиз киши асосан ўтирмаган ва 29 фоиз киши ўтириш ва туришни алмашлаб ишлаган. 12 йиллик кузатув давомида жами 26 257 нафар ўлим қайд этилган, шулардан тахминан 57 фоизи ўтириш кўп бўлган гуруҳга тўғри келади.

Маълумотларни таҳлил қилиш шуни кўрсатдики, асосан ўтирадиганларда барча сабаблар бўйича ўлим хавфи 16 фоиз, юрак-қон томир касалликларидан ўлим хавфи эса 34 фоизга юқори. Айниқса, хавф 60 ёшдан ошган, чекувчи ва сурункали касалликлари (масалан, қандли диабет ва гипертензия) бўлган одамларда юқори бўлган.

Олимлар иш жараёнида ўтириш ва ҳаракатни мувозанатлаш, яъни фаолиятни алмашлаб ташкил этиш орқали бу хавфни камайтириш мумкинлигини таъкидлаган.

Эслатиб ўтамиз, аввалроқ Исроилдаги Бен-Гурион университети олимлари биологик қаришни секинлаштира оладиган иммун тизими ҳужайраларини аниқлаганди. Уларга CD4-Eomes деб ном берилган.