Ермак қамалди, Зеленский атрофидаги коррупция баҳслари авж олди

14 май куни Украина Президенти Владимир Зеленскийнинг ишонган одами қамалди. Киев шаҳар суди Зеленский идорасининг собиқ раҳбари Андрей Ермакни Киев яқинида ҳашаматли уй-жойлар қурилиши орқали пул ювиш билан боғлиқ иш доирасида икки ойлик ҳибсга олиш ҳақида қарор чиқарди. Суд унга 140 миллион гривна (тахминан 3,1 миллион доллар) миқдорида гаров пули эвазига озодликка чиқиш имконияти билан 60 суткалик қамоқ жазоси тайинлади. Андрей Ермак эса ўзида бундай маблағ йўқлигини билдириб, дўстлари ёрдам беришига умид қилаётганини айтди.

Андрей Ермак 2025 йилдан буён Украинадаги коррупция билан боғлиқ можаролар марказида тилга олинмоқда. Бу ҳолатлар ортидан Владимир Зеленский ва унинг атрофидаги коррупция, молиявий манфаатлар ҳамда яширин алоқалар ҳақидаги баҳслар ҳам яна кучайди. 

Ермакнинг эса фолбинлар орқали рақибларига таъсир ўтказгани ҳақидаги иддаолар юзага чиқмоқда. Собиқ амалдорлар билан боғлиқ коррупция можаролари бирин-кетин ошкор бўлаётган бир пайтда, малакат Президенти Владимир Зленский ва унинг рафиқаси Елена Зеленсканинг ажрашётгани ҳақидаги шов-шувли хабарлар Россия манбаларида тарқалмоқда. Ермакка қарши илгари сурилаётган иддаолар Президент атрофидаги сиёсий ва молиявий алоқаларга қандай таъсир қилиши мумкин? Яқин дақиқалар ичида QALAMPIR.UZ шу ҳақда батафсил маълумот беради.

Икки амалдорнинг кирдикорлари йиллар давомида очилган

Украинадаги уруш бошланганидан бери Владимир Зеленский халқаро майдонда Ғарбнинг асосий сиёсий рамзларидан бирига айланди. Уруш Киев учун миллиардлаб долларлик ҳарбий ва молиявий ёрдамларни олиб келди. АҚШ, Европа Иттифоқи ва бошқа давлатлар Украинага юз миллиардлаб доллар ажратди. Шу билан бирга, Зеленский атрофида коррупция, давлат маблағларининг шаффоф эмаслиги ва яқин амалдорлар таъсирининг ортиши ҳақида баҳслар ҳам кучайди.

2021 йилда чиққан “Pandora Papers” суриштирувида Зеленский ва унинг яқин доирасига алоқадор офшор компаниялар ҳақида маълумотлар тарқалган эди. Журналистик суриштирувларга кўра, Зеленский президент бўлишидан аввал офшор тармоқлар орқали медиа активлар ва маблағларни бошқаргани айтилган. Бу мавзудаги материаллар кейинчалик уруш даврида яна қайта муҳокама қилинди.

Уруш Зеленскийнинг сиёсий позициясини кескин кучайтирди. Ғарб давлатлари уни демократия ва Россияга қарши кураш рамзи сифатида кўрсата бошлади. Натижада Украинага келаётган молиявий ёрдамлар ва қурол-яроғ ҳажми улкан даражага етди. Аммо айнан шу катта маблағлар коррупция хавфи ҳақидаги саволларни ҳам кучайтирди. Қатор хорижий нашрлар кейинги йилларда Зеленский атрофидаги айрим амалдорлар ва бизнес доиралари ҳақида суриштирувлар чиқарди.

Бу баҳсларда энг кўп тилга олинаётган шахслардан бири Андрей Ермак ҳисобланади. Ермак Зеленскийнинг энг яқин сиёсий ҳамкори ва “соядаги иккинчи раҳбар” сифатида таърифланади.

Ермакка қарши айблов

11 май куни кечқурун Украина Президенти офисининг собиқ раҳбари Андрей Ермакка нисбатан Коррупцияга қарши курашиш миллий бюроси ва Коррупцияга қарши курашиш бўйича ихтисослаштирилган прокуратураси айблов эълон қилди. Унга уюшган гуруҳ томонидан ёки жуда кўп миқдорда жиноий йўл билан олинган мол-мулкни легаллаштириш моддалари бўйича 15 йилгача қамоқ жазоси берилиши мумкин.

Тергов Киев яқинида премиум тоифадаги уй-жойлар қурилишига сарфланган 10,5 миллион долларни легаллаштиришга алоқадор уюшган гуруҳ фош этилганини маълум қилди. Коррупцияга қарши курашиш миллий бюроси ва Коррупцияга қарши курашиш бўйича ихтисослаштирилган прокуратура маълумотларига кўра, 2020 йилда “Династия” хусусий қароргоҳларини қуриш лойиҳаси бошланган. Тергов маълумотларига кўра, унда Ермак иштирок этган. Иштирокчилар яшаш учун тўртта қароргоҳ қуришга келишиб олган. Коррупцияга қарши курашиш миллий бюросининг билдиришича, қурилиш 2021-2025 йилларда олиб борилган ва Украина можароси бошланганидан кейин коттежлар қурилиши фаоллашган.

Ўтган йилнинг ноябрь ойида Коррупцияга қарши курашиш миллий бюроси ва Коррупцияга қарши курашиш бўйича ихтисослаштирилган прокуратура Зеленскийга яқин бўлган Тимур Миндич бошчилигидаги энергетика соҳасидаги йирик коррупция схемасини фош қилиш учун “Мидас” деб номланган кенг кўламли операция ўтказилишини эълон қилди. Терговга кўра, схеманинг асосий ташкилотчиси бизнесмен Тимур Миндич бўлган. У аввал Зеленскийнинг бизнес ҳамкори сифатида танилган. Коррупцияга қарши курашиш миллий бюроси Миндични сиртдан айблади, шунингдек, унинг хонадонидаги коррупция схемалари муҳокама қилинган суҳбатлар ёзувларининг парчаларини эълон қила бошлади. Жами 1000 соатлик аудио ёзувлар мавжуд. 

2025 йил 17 ноябрда у тадбиркор ва Зеленскийнинг дўсти Тимур Миндич иши бўйича йирик коррупцион схемаларга алоқадор бўлиши мумкинлиги ҳақида маълумот пайдо бўлди. 28 ноябрь куни эрталаб Ермакни тинтув қилишди, кечқурун эса Зеленский уни ишдан бўшатди. Кейинроқ идора Ермак уйидаги тинтувлар Миндич ишига боғлиқ эмаслигини билдирган. Зеленский эса Ермакнинг ишдан олиниши коррупция терговлари билан боғлиқлигини рад этиб, бу қарор учун “ўзига хос сабаблар” бўлганини айтган. Президент маъмуриятидан кетгач, Андрей Ермак адвокатлик фаолияти билан шуғулланиш ҳуқуқини тиклади ва Украина Миллий адвокатлар ассоциацияси ҳузурида ташкил этилган уруш жабрланувчиларини ҳимоя қилиш қўмитасига раҳбарлик қила бошлади. Шунингдек, унинг ўрнига яъни, Украина Президенти офиси раҳбари лавозимига 2026 йил 2 январь куни Украина ҳарбий разведкаси собиқ раҳбари Кирилл Буданов тайинланган.

Жорий йил апрель ойининг охиридан бошлаб Украина оммавий ахборот воситалари ва депутатлар аудиоёзувларнинг янги парчаларини эълон қила бошлади. Унда Миндич ўша пайтда мудофаа вазири лавозимида ишлаган Украина Хавфсизлик кенгашининг амалдаги котиби Рустам Умаров билан кўп миллионли шартномаларни ўзлаштириш, тадбиркорга алоқадор компания томонидан дронлар ишлаб чиқаришни молиялаштириш, шунингдек, Украинанинг АҚШдаги элчиси лавозимига номзодларни муҳокама қилган. Бошқа парчалар шуни кўрсатадики, Миндич бир нечта ҳашаматли уйларни, шу жумладан ўзи, “Вова” ва “Андрей” учун жиҳозлашни муҳокама қилган. Тахминларга кўра, гап Зеленский ва Ермак ҳақида кетмоқда. Бундан ташқари, транскрипцияларнинг бир қисми Зеленский атрофидагилар турли компанияларни қандай назоратга олаётганини кўрсатади.

Бироқ шуни ҳам қайд этиш керакки, Зеленский ва Ермак бу айбловларнинг катта қисмини рад этиб келмоқда. Украина ҳукумати бу материалларнинг бир қисмини Россия ахборот уруши ва сиёсий босимнинг бир бўлаги, деб атаган. Ҳозирча кўплаб айбловлар бўйича якуний суд қарори чиқмаган.

Ермак фолбинлар орқали рақибларини “иссиқ-совуқ” қилган

Андрей Ермак 2025 йил охирида фолбинга ўзининг сиёсий рақиблари, жумладан, коррупцияга қарши кураш идоралари раҳбарларининг исмларини юборган ва “ҳаммасига тайёр” эканини қўшимча қилган. 13 май куни бўлиб ўтган судда Коррупцияга қарши курашиш бўйича ихтисослаштирилган прокуратура прокурори ўқиб эшиттирган ушбу ёзишмалар парчалари эса мамлакатда жиддий сиёсий инқироз ва шов-шувларга сабаб бўлган.

Ермак телефонида “Вероника Феншуй” номи билан сақланган шахс аслида оккультизм ва фолбинлик хизматлари билан шуғулланган Вероника Аникевич бўлгани айтилмоқда. Унга юборилган ёзувларда Коррупцияга қарши курашиш бўйича ихтисослаштирилган прокуратура раҳбари Александр Клименко ҳамда Украина Миллий коррупцияга қарши бюроси раҳбари Семён Кривоноснинг исмлари қайд этилган. Ушбу аёл Ермакка ҳаракат қилиши кераклигини ёзган.  Уларнинг ўртасидаги ёзишмаларда Вероника томонидан Ермакка “Ё сиз уларни, ёки улар сизни” деган жумлалар бор. Бунга жавобан Ермак яна бир қатор исмларни – “Украинская правда” газетаси журналистлари Михаил Ткач ва Севгил Мусаева, “Украинская правда” газетасининг ўзи, унинг эгаларидан бири Томаш Фиалу, Олий Рада депутатлари Ярослав Железняк, Алексей Гончаренко ва Давид Арахамия исмларини ёзиб юборган. Ермак: “Мен ҳамма нарсага тайёрман. Эртагаёқ”. “Вероника Феншуй” эса унга жавоб тариқасида мамлакатдан чиқиб кетишни маслаҳат берган. 

Ёзишмалар Ермак коррупция можароси оқибатида Зеленский идораси раҳбари лавозимидан истеъфога чиқарилганидан бир неча ҳафтадан кейин бўлиб ўтган. Илгари, Ихтисослаштирилган прокуратура маълумотларига кўра, у бир қатор давлат лавозимларига тайинлашда худди шу фолбин билан маслаҳатлашган. Ермакнинг ўзи эса журналистлар билан суҳбатда фолбинлар билан мулоқот қилганини тан олмаган. 

“Новости Live” нашрининг ёзишича, гарчи суд мажлиси пайтида прокурор Ермак ўзининг сиёсий рақибларининг исмларини фолбин аёлга юборгани фактини келтирган, шунингдек, кадрлар бўйича маслаҳат берган ёзишмаларининг парчаларини ўқиб эшиттирган бўлса-да, Ермак фолбинлар билан мулоқот қилгани ва эзотерика билан ҳар қандай алоқасини рад этган. Шундан сўнг Украина ОАВлари Вероника исмли фолбинни излаб топган. У рус тилида астрологик Telegram-канал юритадиган 51 ёшли Киев фуқароси бўлиб чиқди. Январь ойида Зеленскийнинг собиқ матбуот котиби Юлия Мендел Ермак сеҳрли маросимлар билан шуғуллангани ва Украинага хориждан сеҳргарларни олиб келганини айтган бўлиб чиқди. 

Ермакда 4 та дип-паспорт бор, у қочиши мумкин – прокурор

Бир неча корупцион айбловлар остида қолган Украина Президенти Владимир Зеленский идораси собиқ раҳбари Андрей Ермакнинг бир нечта паспортлари борлиги аниқланди. Прокурорнинг сўзларига кўра, у терговдан яшириниши ҳам мумкин.

“Ермакнинг ҳокимият органларида ва Украинадан ташқарида касбий ва ижтимоий алоқалари бор. Бу унга чет элда яширинишга ёрдам бериши мумкин”, деган прокурор.

Прокрор сўзларини тасдиқлаш учун терговчилар Ермакдан тўртта дипломатик паспорт топганини, уларнинг охиргиси 2030 йилгача амал қилишини айтган. Тергов маълумотларига кўра, 2022 йил 24 февралдан бери Ермак давлат чегарасини 100 га яқин марта кесиб ўтган, бундай сафарлар ҳақидаги сўнгги маълумотлар Украина Чегара хизмати тизимидан ўчирилган. Бундан ташқари, прокурорнинг таъкидлашича, Ермакнинг 2019 йилда ишлаб чиқарилган Mercedes Benz автомобили бор, у умуман ИИВ тизимида рўйхатдан ўтказилмаган. Суд мажлисида танаффус эълон қилингач, Ермак ОАВ вакилларига ўзининг айбсизлигига ишонишини билдирган.

“Мен ўзимга ишонаман, одамларнинг кўзига ҳалол қараш ва Украинада қолиш учун нима қилганимни ва нима қилмаганимни аниқ биламан”, дейди Ермак.

Зеленский хотини билан ажрашяпти

Украина Президенти Владимир Зеленский ва унинг рафиқаси Елена Зеленская ажрашаётгани ҳақидаги хабарлар Россия ОАВларида айнан Президент офиси собиқ раҳбари Андрей Ермак атрофидаги шов-шувли коррупция можаролари фонида тарқалмоқда.

Россиянинг РИА Новости агентлиги куч тузилмаларидаги манбаларига таяниб хабар беришича, Зеленский рафиқаси билан ажрашишга тайёргарлик кўраётган бўлиб, Киев яқинидаги “Династия” ҳашаматли тураржой мажмуасидаги коттежлардан бирини қолдиришни режалаштирган. Украина Миллий коррупцияга қарши бюроси маълумотларига кўра, “Династия” лойиҳаси иштирокчилари 460 миллион гривнадан ортиқ маблағни легаллаштирган.

“Династия” кооперативидаги тўртинчи уй Елена Зеленская учун қурилган бўлиб, у ажралиш олдидан компенсация сифатида мўлжалланган эди”, дейилади хабарда.

Манба, шунингдек, уй эгаси “Вова” эканини ҳам айтган. Зеленскийнинг собиқ матбуот котиби Юлия Менделнинг маълум қилишича, “Миндич аудиоёзувлари”да тилга олинган “Вова” лақаби остида айнан Владимир Зеленский назарда тутилган.

Бироқ 13 май куни Зеленский ва Елена Руминияга ташрифи вақтида қўл ушлашган ҳолатда самолётдан тушиб кўриниш берганди. Бу ҳолат ажралиш ҳақидаги хабарлар фонида жамоатчилик эътиборини тортди.

Зеленский Украинадаги пул ювиш ишида иштирок этганми?

Украина Миллий аксилкоррупция бюроси (МАКБ) Владимир Зеленскийнинг пул ювиш билан боғлиқ ишда иштирок этган-этмаганлиги тўғрисидаги саволга якуний жавоб берди. 

“Украина Президенти судгача бўлган тергов доирасида иштирок этмаган ва иштирок этмаяпти. Айбсизлик презумпциясини бузмаслик учун компаниялар номларини айта олмайман. Биз мудофаа соҳасидаги йўналиш ҳақида гапирган эдик, у МАКБ доирасида тергов қилинмоқда. Дрон ишлаб чиқарувчилар ва айрим алоҳида ишлаб чиқарувчилар тергов қилинмоқда”, дейди бюро директори Семен Кривонос.

Семен Кривонос, шунингдек, тергов турли йўналишларда: энергетика, мудофаа, жумладан, дрон ва қурол-яроғ хариди бўйича давом этаётганини аниқлаштирди. Унинг қўшимча қилишича, тергов халқаро ҳамкорлик доирасида кўплаб сўровлар юборган.