Европа етакчилари Трампга сим қоқди

Франция Президенти Эммануэль Макрон, Германия канцлери Фридрих Мерц ва Буюк Британия Бош вазири Кир Стармер кеча, 10 декабрь куни АҚШ Президенти Дональд Трамп билан 40 дақиқалик телефон суҳбатини ўтказди. Бу ҳақда Британия ҳукуматининг расмий сайтида маълум қилинди.

Суҳбатнинг мақсади – Укринадаги вазият ва тинчликка эришиш бўйича олдинга қадам ташлашдан иборат эди. 

Расмий маълумотга кўра, томонлар ҳозир Укринанинг ўзи, унинг аҳолиси ва бутун Евро-Атлантика ҳудуди хавфсизлиги учун жуда муҳим, кескин паллада турганини таъкидлаган. Мерц, Макрон ва Стармер АҚШнинг Украинада барқарор тинчликка эришиш ва зўравонликни тўхтатиш учун кўрсатаётган саъй-ҳаракатларини юқори баҳолаган. 

Қайд этиш жоиз, бугун, 11 декабрь куни Буюк Британия ва Франция раислигида Украина хавфсизлиги бўйича видеоконференция ўтказилиши режалаштирилган. Бу йиғилишда Россия тажовузи остида қолаётган Украинани қўллаб-қувватлаш бўйича масалалар, жумладан, АҚШнинг эҳтимолий ҳиссаси ҳам муҳокама қилинади.

Олдинроқ, АҚШ Украинадаги урушни якунлаш бўйича ўз режасини тақдим этган эди. Дастлабки вариант Киев ва Европа Иттифоқи томонидан Москва манфаатларига мос деб баҳоланган. Шундан сўнг, режа босим остида қайта кўриб чиқилди.

Шу воқеалар фонида Трамп Зеленскийни танқид қилишни ҳам бошлаб юборди. Ҳукумати оғир аҳволда қолаётган Зеленскийга Трампнинг сайлов ўтказиш ҳақидаги гаплари янада босим юклади. Владимир Зеленский эса Трампга жавобан мамлакат президентлик сайловларинни 2-3 ой ичида ўтказишга тайёр бўлиши ҳақида айтди. У, шунингдек, сайловларга тайёр экани, ҳокимият курсисига ёпишиб олмаганини ҳам қўшимча қилган.