Европадаги 3 давлат Украина учун Америка қуролларига пул тўлашдан бош тортди

НАТОнинг Европадаги учта давлати – Франция, Италия ва Чехия Украина учун Америка қуролларига пул тўлаш ташаббусида иштирок этишдан бош тортди. Бу ҳақда кеча, 15 июль куни турли ўз манбаларига таяниб, “Politico” хабар берди.

Нашрнинг ёзишича, Франциянинг салбий позицияси мамлакат Президенти Эммануэль Макрон узоқ вақтдан бери европаликлар ички харидлар орқали ўз мудофаа саноатини ривожлантиришни таъкидлаб келаётгани билан изоҳланади. Айни пайтда Франция ҳукумати бюджет тақчиллиги билан курашишга уринар экан, ўзининг мудофаа харажатларини оширишда қийналмоқда.

Худди шу сабабларга кўра – бюджет – Италия ҳам харидларни тўлаш ташаббусига қўшилишни истамайди. Италиянинг бюджет имкониятлари деярли йўқ.

“Бу ерда ҳеч қачон Америка қуролларини сотиб олиш ҳақида гап бўлмаган”, дейди “La Stampa”нашрининг Италия Мудофаа вазирлигидаги манбалари.

Чехия Бош вазири Петр Фиала ҳам унинг мамлакати Украина учун Америка қуролларини сотиб олишда иштирок этиш ниятида эмаслигини айтди.

“Чехия “Чехия ўқ-дорилари ташаббуси” каби Украинани қўллаб-қувватлашнинг бошқа лойиҳалари ва йўлларига эътибор қаратмоқда. Шунинг учун, ҳозирги босқичда биз ушбу дастурда иштирок этишни кўриб чиқмаяпмиз”, деди у “Publico” нашри учун шарҳида.

“Politico” Германияни Украинага Америка қурол-яроғи етказиб бериш учун тўлаш ғоясининг асосий ташаббускорларидан бири сифатида кўрсатмоқда. Германия канцлери Фридрих Мерцнинг сўзларига кўра, сўнгги кунларда у АҚШ Президенти Дональд Трамп билан бир неча бор гаплашган ва уни Германия етказиб беришда “ҳал қилувчи роль ўйнашига” ишонтирган.

“Мерц ҳукумати фикрича, Америка қуролларини сотиб олиш Европанинг чекланган ишлаб чиқариш имкониятларини ҳисобга олган ҳолда Украинани зарур воситалар билан тезда таъминлашнинг бир неча йўлларидан биридир”, деб ёзади “Politico”.

НАТО Бош котиби Марк Рютте, шунингдек, Буюк Британия, Нидерландия, Дания, Швеция, Норвегия ва Канадани Америка таъминоти учун тўлов ташаббуси тарафдорлари деб атади.

Эслатиб ўтамиз, 14 июль куни Трамп АҚШ ва унинг иттифоқчилари Украинага қурол етказиб бериш бўйича келишув тузганини, унга кўра, Киевга Америка қуроллари етказиб берилишини, Шимолий Атлантика иттифоқи давлатлари эса бунинг учун пул тўлашини маълум қилганди. Эртаси куни Трамп Украинага Patriot тизимлари учун ракеталар етказиб бериш аллақачон Германиядан юборилаётганини, кейин эса Германия уларни алмаштиришини эълон қилди.