Йигитларни Украинадаги урушга ёллаган собиқ президентнинг қизи истеъфога чиқди

Жанубий Африка Республикаси Миллий ассамблеяси депутати, Жанубий Африка Республикаси (Жанубий Африка) собиқ раҳбари Жейкоб Зуманинг қизи Дудузиле Зума-Самбудла 17 нафар жанубий африкаликларни Украинадаги жангларга ёллагани ҳақидаги айбловлар ортидан ўз лавозимини тарк этди. Бу ҳақда “The Guardian” хабар берди.

Хабарда айтилишича, 43 ёшли Зума-Самбудла ўз ихтиёри билан истеъфога чиққан ва полиция билан эркакларни уйига қайтариш учун ҳамкорлик қилмоқда.

Ноябрь ойининг бошида Жанубий Африканинг собиқ президентининг яна бир қизи Нкосазана Зума синглиси Дудузила устидан полицияга ариза бериб, уни жанубий африкаликларни ёллашда айблаган эди. Унинг сўзларига кўра, унинг синглиси ва яна икки нафари 17 кишини алдаб, рус армиясига олиб кетган.

“Эркаклар Россияга Жейкоб Зуманинг сиёсий партияси, “Миллат найзаси” қўриқчиси сифатида тайёргарлик кўриш учун кетаётганига ишонган”, дея таъкидлаганди Нкосазана.

Зума-Самбудла йигитларни фронтга юборилмасликка ишонтирган бўлса-да, Россияга жўнатилган йигитлар оилаларига, телефон ва банк карталари олиб қўйилгани ва улар уруш зонасига олиб кетилаётганини хабар берган. Август ойидан бери улар оилалари билан алоқа қилмаган.

“Bloomberg” аввалроқ Жанубий Африканинг собиқ раҳбарининг қизини Украинадаги уруш зонасига ёллаш билан боғлаган эди. BBC Дудузиле Зума-Самбудла давлатга хиёнат айби билан тергов қилинаётганини хабар қилди. Агар айбдор деб топилса, у умрбод қамоқ жазосига ҳукм қилиниши мумкин.

Зума-Самбудла, ўз навбатида, у алданиб, қурбон бўлганини таъкидлайди. Жанубий Африканинг собиқ президентининг қизи қўшимча қилишича, у ҳеч қачон жанговар ёки ёлланма ҳаракатларда қатнашиш учун ҳеч кимни жалб қилмоқчи эмас.

Дудузиле Зума-Самбудла аъзо бўлган Жанубий Африканинг собиқ президенти Жейкоб Зуманинг “Миллат найзаси” партияси истеъфога чиқиш айбни тан олишни англатмаслигини таъкидламоқда.

Россия Президентининг матбуот котиби Дмитрий Песковнинг қайд этишича, Кремлда Жанубий Африка фуқароларининг уруш зонасидан уйларига қайтиши сўралгани ҳақида ҳеч қандай маълумот йўқ. Россия ТИВ матбуот котиби Мария Захарованинг маълум қилишича, Россия Жанубий Африкадан ўз фуқароларининг Украинадаги ҳарбий операция зонасида бўлиши бўйича ҳеч қандай сўров олмаган.

Жейкоб Зума Жанубий Африканинг тўртинчи президенти бўлиб, 2009 йилдан 2018 йилгача ушбу лавозимда бўлган. Унинг қизи ҳозирда Жанубий Африка Миллий Ассамблеяси аъзоси. Иккаласи ҳам Африка Миллий Конгресси (ANC) партиясининг собиқ вакиллари эди, аммо уни тарк этиб, “Миллат найзаси” партиясига қўшилди.

Зума президентлик даврида коррупция бўйича терговда иштирок этишдан бош тортгани учун ва судга ҳурматсизлик қилгани ортидан қамоққа ташланган. Кейинчалик у 2024 йилги парламент сайловларида учинчи ўринни эгаллаган “Миллат найзаси” партиясини тузди.

Зума олти марта расман турмуш қурган (у кўпхотинлик). “The South African” нашрининг ёзишича, унинг 20 га яқин фарзанди бор.

Эслатиб ўтамиз, аввалроқ Қирғизистонда Жогорку Кенеш депутатлигига номзоднинг қизи ва жияни овозларни сотиб олишда гумон қилиниб, уларга қидирув эълон қилинганди.