Зеленский Россиянинг ойлик йўқотишларини 50 мингга етказишга ваъда берди

Украина Президенти Владимир Зеленский Украина армияси олдига ҳар ой камида 50 минг нафар россиялик ҳарбийни йўқ қилиш вазифаси қўйилганини маълум қилди. Бу ҳақда у бугун, 14 февраль куни Мюнхен хавфсизлик конференциясидаги нутқида сўз очди. 

Унинг айтишича, бу кўрсаткич замонавий Россия қуролли кучларининг йирик ҳарбий корпуси ёки кичик умумқўшин армияси сонига тенг.

“Армиямизнинг вазифаси аниқ: имкон қадар кўпроқ россиялик босқинчиларни йўқ қилиш. Мақсад ҳам конкрет – ойига камида 50 минг киши. Ишончим комилки, ҳатто Россия учун ҳам бу жиддий бўлади”, дейди Зеленский.

Президентнинг сўзларига кўра, 2025 йил декабрь ойида Украина қуролли кучлари 35 минг нафар россиялик ҳарбийни ўлдирган ёки оғир яралаган. Жорий йилнинг январь ойида эса Россия қўшинларининг ҳужумлари интенсивлиги пасайгани сабабли, уларнинг қайтариб бўлмас йўқотишлари 30 минг кишигача тушган. Зеленский, шунингдек, Россия Донетск йўналишида эгалланган ҳар бир километр ер учун “156 нафар аскар ҳаёти билан тўлаётгани”ни таъкидлаган.

Вашингтондаги “Center for Strategic and International Studies” (CSIS) баҳоларига кўра, ўтган йил охирига келиб Россия Қуролли кучларининг умумий йўқотишлари 1,198 миллион кишига етган, шундан 325 минг нафари ҳалок бўлган. Фақат 2025 йилнинг ўзида ҳалок бўлган ва яраланганлар сони 425 минг кишини ташкил этиб, ўртача ойига 35 минг атрофида бўлган.

Қишда кескин ошган бундай катта йўқотишларга қарамасдан, Россия сезиларли стратегик силжишга эриша олмаган. “Bloomberg” манбаларининг қайд этишича, ҳозирги суръатда Россия генералларига бутун Донбассни эгаллаш учун қарийб икки йил вақт керак бўлади.

Эслатиб ўтамиз, Владимир Зеленский Мюнхен хавфсизлик конференциясидаги нутқида Россия Президенти Владимири Путин ўзини “подшо” деб билишини, аммо аслида у “урушнинг қули” эканини айтган эди.