Урушни тугатиш учун Зеленский ҳаракат қилиши керак – Трамп (видео)

АҚШ Президенти Дональд Трамп Россия Украина билан тинчлик келишувини тузишни истаётгани ва энди Украина Президенти Владимир Зеленский ҳам ҳаракат қилиши кераклигини айтди. Бу ҳақда у бугун, 14 февраль куни журналистларга берган интервьюсида сўз очди.

Трамп журналистлар саволига жавоб берар экан, у Зеленскийнинг тезроқ ҳаракатни бошлаши ва бундай ажойиб имкониятни қўлдан бой бермаслик кераклигини билдирган.

“Россия келишув тузмоқчи ва Зеленский ҳаракат қилиши керак. Акс ҳолда у ажойиб имкониятни қўлдан бой беради, у ҳаракат қилишига тўғри келади”, деган Оқ уй етакчиси.

Зеленский эса Мюнхен хавфсизлик конференцияси чоғида журналистларга берган интервьюсида АҚШ босими остида қандай ён беришлар бўлиши мумкинлиги ҳақида фикр билдирган.

Унинг сўзларига кўра, Америка томонидан, жумладан Трампдан сигнал келган.

У, шунингдек, АҚШ босими остида Киев олдиндан ҳеч қандай шартларсиз ўт очишни тўхтатишга рози бўлгани, аммо Россия бу таклифни рад этганини билдирган.

“Financial Times” Украина ва Ғарб амалдорларига таяниб, Киев 2026 йил баҳорида президентлик сайловлари ва Россия билан тинчлик келишуви бўйича референдум ўтказишга тайёрланаётгани ҳақида хабар берган эди. Манбаларга кўра, Зеленский бу ҳақда 24 феврал – Россия ҳарбий операцияси бошланганининг тўртинчи йиллигида расман эълон қилиши мумкин.

Нашр манбалари айтишича, Трамп маъмурияти Украинадан ҳар икки овоз беришни 15 майгача ўтказишни ва ёзгача Россия билан тинчлик музокараларини якунлашни талаб қилган.

Кейинроқ Зеленский бу маълумотларни рад этган. Унинг таъкидлашича, сайловлар хавфсизликнинг барча кафолатлари таъминланганидан кейингина ўтказилиши мумкин. Президентга кўра, сайловлар масаласини кўпроқ Украина иттифоқчилари кўтаради, Киевнинг ўзи эмас.

Эслатиб ўтамиз, аввалроқ Мюнхен хавфсизлик конференцияси бу йил Россия–Украина урушини тугатиш бўйича музокаралардаги муваффақиятсизликни янада яққол кўрсатиши мумкинлиги ҳақида хабар берилганди.