Зеленский яна Ватиканда. Рим папаси музокарачиларни қабул қилишга тайёрлигини билдирди

Католикларнинг руҳий етакчиси, Ватикан раҳбари, яъни Рим папаси Лео ХIV бугун, 9 июль куни Украина Президенти Владимир Зеленский билан учрашувда Россия ва Украина вакилларини музокаралар учун Ватиканда қабул қилишга тайёрлигини тасдиқлади.

Президент Зеленский 10 июлда бошланадиган Италия мезбонлик қиладиган “Украинани тиклаш бўйича конференция”да иштирок этиш учун бугун тушда Римга борди. Ватикан матбуот хизмати баёнотида айтилишича, Рим папаси Лео ХIV Зеленский билан Кастель Гандолфодаги (Римдаги ёзги сарой) қароргоҳида учрашган.

“Учрашувда давом этаётган уруш, адолатли ва мустаҳкам тинчлик ўрнатишнинг шошилинч зарурати муҳокама қилинди”, дейилади баёнотда.

Суҳбат чоғида мулоқот ҳарбий ҳаракатларга барҳам беришнинг имтиёзли усули эканлиги таъкидланди. Рим папаси қурбонлар учун қайғусини изҳор қилди ва ўзининг дуолари ва яқинлиги билан Украина халқини қўллаб-қувватлашини тасдиқлади, маҳбусларни озод қилиш ва умумий ечим топиш учун барча саъй-ҳаракатларни рағбатлантирди.

Баёнотда, шунингдек, Рим папаси Лео ХIV музокаралар учун Ватиканда Россия ва Украина вакилларини қабул қилишга тайёрлигини тасдиқлагани қайд этилган.

Италиянинг ANSA ахборот агентлигининг хабарига кўра, Рим папаси билан учрашгандан сўнг журналистлар билан суҳбатлашган Зеленский, айниқса, “ушбу уруш пайтида Россия томонидан ўғирлаб кетилган украиналик болаларни қайтаришда” кўрсатган ёрдами ва қўллаб-қувватлаши учун Папа ва Ватиканга миннатдорлик билдирган.

Эслатиб ўтамиз, 12 май куни Рим-католик черкови раҳбари этиб сайланганидан тўрт кун ўтиб, Лео XIV Украина Президенти Владимир Зеленский билан телефон орқали гаплашганди. Президент украиналик болаларни Россия Федерациясидан қайтаришда понтификдан ёрдам сўради ва уни Украинага таклиф қилди.

18 май куни, тахтга ўтирганидан сўнг дарҳол Лео XIV Ватиканда Зеленский билан учрашиб, “Украина учун адолатли ва мустаҳкам тинчлик бўлишини” тилади.

Шунингдек, Рим папаси Лео XIV Россия Президенти Владимир Путинни Украинада “тинчликка ёрдам берадиган ишора” қилишга чақирди. Бироқ Россия Ташқи ишлар вазири Сергей Лавров Россия ва Украина ўртасида Ватиканда музокаралар ўтказиш имкониятини рад этиб, бу ҳақиқатга тўғри келмаслигини таъкидлаган.